الموت والطيش

كفني.. بيدّي.. والنصايب.. ولحدي
واقف على جال القبر وقْفت الطيش!!

ماهو بطيش المحتزم للتردّي
ياما يساومني ولاقلت له بيش؟؟

قبر(ن) عتيق(ن) أطرم(ن) مايلدّي
مهجور منسي غاشي(ن) لحده الريش!!

اصرخ على ترابه وعيّا يردّي
ماغير في وجهي تطاير خفافيش!!

ماني بنا اطيب من عمامي وجدّي
اللي حملوهم في نفيس النواعيش!!

اضحك وقلبي يشتكي سيل خدّي
ضحك(ن) يخلي راعي العقل درويش!!

درب(ن) يجيبه ياعسى مايودّي
يقطع مذلّه من ورى الخبز والعيش!!

الحال لوهو منحني وامْتردّي
تبقى الجذور اللي تغنى بها قريش!!

ان عشت للظلما ترى النور ممدي
وان متّ قاصرت الرجاجيل وعشيش!!

والحمدلله ماتعديت حدّي
لو دوني اليتمان شيبان واغويش!!

هذاك همّ(ن) صاحبه مايقدّي
يغزي بقلبي مثل مايغزي الجيش!!

ماباقي الا شيخ قومه أفندي!!
وانبدّل عقال العرب بالطرابيش!!

ياحظي الزاهد ياعلّك بكبدي
علمتني كيف اعشق الموت والطيش ؟!!