ارهاب الرمش

يالزين علّمني على نطق الاحرف
حيث الغلا يجري مع الدم ... منساب

أبنطقك لين الثريّا تغطرف
ولين الهوى يمسي على راس مرقاب

برموشها كل الغلو والتطرف
وبعيونها كل الشجاعه والارهاب

الجيد كنّه جيد فتّان الاطرُف
والكف مثل الشمس مصبوغ باخضاب

عند العرب آحبّها واتشرّف
وعند العجم رجل انتحاري ولاهاب

لاسلهمت لي قمت اناور واصرّف
حتى لبسني من غلا الزين جلباب

مدري شسوّي هدّني الرمش الاترف
هدّت مباني ( بوش ) بيدين الاشناب

جيته وانا قصدي عليها تعرّف
ملعون ابو جد الهوى طحت بالناب

( بقْوانتنامو ) عشت عاشق مخرّف
بالمعتقل ماغير انا وحارس الباب!

سبّة خيانة جيش ( برْويز مشرّف )!
معشوقتي غابت بلا ذنب واسباب!

أقسم قسم مامثلها بالتطرّف
ياالله دخيلك لاالْتُوَنْ ذيك الاهداب