ضحكه وجيه

الصاحب اللي مايبيني ولا أبيه
يخلي سبيلي مثل ما أخلي سبيله

مالي مشاريهٍ ولا له مشاريه
لو أنّه أقرب واحدٍ فالقبيله !

أن جاء مثل غيره عسى الله يحييه
وأن راح ماعلقتها في شليله

ماني رفيق اللي مصاحب تواليه
متاهةٍ يضيع فيها الدليله !؟

خوّة نهار وضحكة وجيه لوجيه
تبيعك وتشريك بأهون وسيله

والرجل عن صلف الهبايب يذريه
( ثنتين ) مال لثانيتهن بديله ؟؟

من الجبال ( اللي طوالٍ مراقيه )
ومن البشر ( وريث مجد وسليله )

ياخذ عمس خاطر رفيقه ويعطيه
قدرٍ على راحة كفوفه يشيله

تطري علي ( الأوّله ) عند طاريه
وأذكر مواقفْه الجسام الجليله

يوم أن ( حزات الشدايد ) تسميه
( متن الحمول ) الكايدات الثقيله

اللي ليا منّي تبيّنت أناديه
يبيع عشر سنين من شان ليله

يقول لي : ( أبشر وحاضر ولبيه )
وأقول له : ( عسى حياتك طويله )