اليوم عيد ميلادي - مطلع الشمس

اليوم ذا مو مثل كل يوم
اليوم ذا عيد ميلادي

هنيت به ياعزيز القوم
ياغاية القلب والمرادي

ودي تحطه ف بالك دوم
وابغيه في كل سنه يعادي

تاريخ في الذاكرة معلوم
في قلبك مطر وغادي

خل البشاير عليه تهوم
مثل احتفالات لعيادي

اعزم له بدور ويا انجوم
محسوب ماهو حدث عادي

اهدي له الورد والمشموم
والعود والفل والكادي

خل المشاعر عليه تقوم
وتهيض البلبل الشادي

انته وانا والسعد معزوم
يسمر على جونا الهادي

والأمل في عيوننا مرسوم
ويضوي الشمع وينادي

وعمري وعمرك سنين يدوم
ويبقى الغلا زادك وزادي

واهني النفس في ذا اليوم
مبروك لك عيد ميلادي

© 2022 - موقع الشعر