عيد ميلادي .. - سيف بن سالم الغسيني

الوقت يمضي والليالي تعدي
وأعمارنا تنقص والايام تبلى
ليت الزمن نوّخ عقاربه عندي
بس الزمن دايم عقاربه عجلى
يا عيد ميلادي أبطلبك هدي
ما زالت أحلامي من سنين حبلى
حاولت أسقي من أمانيك وردي
لكن ورودي كلها اليوم ذبلى
حياتنا رحله وكلها تحدي
ونقدر نخلي صعب الأيام سهلا
ويا قلب مهما صار هالوقت ضدي
خلك كريم وخل عطاياك جزلى
ليت الفرح مثل الهدايا بيدي
وأهدي القلوب الي حزنها تولى
ويا هم لا تمطر سحايبك، عدي
بعض البشر عيّت من الكسر تسلى
مدري دروبي وين ودها تودي
وكل أمنياتي أصعب الوقت ولى
ويا عيد ميلادي لو العمر سردي
كنت أوعدك إن النهايات أحلى
© 2022 - موقع الشعر