حالي الذوق

عطني غلا واعطيك عمري وحالي
حبٍ مخلّد ما حلم فيه مخلوق

يا شاغل احساسي وعمري وخيالي
يا من لقلبي بلسم الجرح والعوق

مِنْك الوفا يكفي وهذا منالي
في دنيتي يا حالي الطبع والذوق

أرقب وِفَاكْ وحايره في سؤالي
واحس اني دون شوفتك مخنوق

بعدك يعذبني.. يزيد انشغالي
الله يعين ويفرج الهم بشفوق

في وحدتي أجلس أعد اليالي
واسهر معاها لين طلعات لشروق

صوتك يصبِّرني ويرثي لحالي
اسْتَر به ويخفف الهم الشوق

وان شفت طيفك ابتهج باحتفالي
واسرح لحد الصبح ينساب وافوق

عجّل بوصلك واِفْتِهم ما جرالي
وان مِتْ انا افداك يا حالي الذوق