ياموجز النشره .. قبل عرض الاخبار

ياموجز النشره .. قبل عرض الاخبار
والعلم يكفي عن كثيره .. قليله

الصورة اللي جت على بث .. الاقمار
خلت ليالينا القصيره .. طويله

الحرب في بغداد .. والسوق منهار
والنا مع الارهاب .. حطه وشيله

ولبنان .. ضاعت بين خاين وغدار
كل ٍ يبا يحتال فيها .. بحيله

وحماس في غزه تحت قصف وحصار
والقدس .. في سته وستين نيله

وايران .. مقطاع البحر تشعم النار
ماباقي الا تشتعل .. فالفتيله

والغرب جانا الغرب من كل الاقطار
والشرق مامن شرق ضايع دليله

واما عربنا .. كيفهم بن وبهار
واليا تعشوا .. كرعوا فالعبيله

والعولمه .. شدت لها كل الانظار
نو ٍ تشقق بارقه في .. مخيله

ليل ٍ تطاولنا بالانواء والاخطار
يدلج بمنجومه .. وعابر سبيله

حرية المرأه .. وتحرير الافكار
وردع الفضيله .. وارتكاب الرذيله

ومع زحمة الارياء .. يضيعن الاشوار
كل ٍ على همه سرا كل ليله

ماعاد للشايب .. معزه ومقدار
وحتى البزر ماعاد به .. ياحليله

وحنا سواة اللي مخير ومحتار
بين اشهب اللال .. وحياة الفشيله

نبغى السلامة .. من تصاريف الاقدار
والوقت ضيق .. والنتيجه ثقيله

وان ماتعاهدنا على .. قمع الاشرار
والا غزانا كل .. قوم وقبيله

سلام مني .. ياطويلين الاشبار
ياهل المواقف .. والفعول الجزيله

في ظل عبدالله حما الدين والدار
صقر العروبه .. مانبايع بديله

يسوقنا ونسوق الانفس والاعمار
وحنا معه في كل عدله وميله

درع ٍ لبو متعب .. وللديره اسوار
واللي يلد العين فينا .. نزيله

على النقا .. والوقت لابد يندار
حتى تبين الطيبه .. والهزيله

وختامها صلوا على .. خير الابرار
شفيعنا .. يوم انعدام الوسيله