البارحة من غيبة الشمـس مهمـوم - محمد راشد الموركي

البارحة من غيبة الشمس مهموم
مدري وش اللي جاب طاري غرامي

الليل كله .. مادخل عيني النوم
الين بان النور .. عقب الظلامي

والمشكله .. ماهيب ليله ولايوم
المشكله صارت .. سواة النظامي

هاذي ثلاث سنين .. وعلومي علوم
يروح ليلي مايروح اهتمامي

اما سهر والا كوابيس وحلوم
والله مدري في الحقيقه علامي

لانيب مطعون ِ ولانيب مسموم
وكنه يكسر بالمحبه عظامي

اسري كما يسري مع الليل منجوم
انحر سهيل ومشغل القلب شامي

وأورد افكاري على القاف وتصوم
وفالصبح اصدر ماوردن الحيامي

الين اخذت الشعر من بعده سلوم
وحلفت لا اورد عليه الظوامي

سر ياقلم واكتب ترى الشعر مفهوم
واذا قرت شعري بتفهم كلامي

سجل لها .. قاف ِ من الشعر منظوم
وانت الحكم وانت الخصم والمحامي

وانت الوصل مابيني وبينها دوم
وانت الجواد اللي يتل الخطامي

قل مارقد .. يجلس مع الهم ويقوم
الليل كله ... مايذوق المنامي

تسري عليه حلوم .. ويصبح هموم
وان فز من نومه سريع المقامي

واليا غفى طرف ِ من النوم محروم
يسرق من الغفوات مثل الحرامي

سر ياقلم باسم الغلا وانت محشوم
لولا الحيا والله .. لعد الاسامي

سر ياقلم وان حال من دونها قوم
اقل حاجه بس .. وصل سلامي

© 2024 - موقع الشعر