مدري وش اللي جابها - محمد راشد الموركي

مدري وش اللي جابها في حياتي
صدفه .. وصدفه .. خير من الف ميعاد

جتني بها الصدفه .. وحظ ٍ مواتي
وجابتني الصدفه .. من بلاد لبلاد

لحظة لقاء .. جابت جميع أمنياتي
في غيبة ٍ .. عن كل عاذل وحساد

سحابة ٍ .. مرت ورشت نباتي
مقدم سحاب ٍ من مناشيه .. منقاد

غيمة مطر .. جت من جميع الجهاتي
تدقها صلف الهبايب .. وتزداد

تلعب .. كما تلعب غرير البناتي
في جوها .. وتشيل بارق ورعاد

اجتاحت شعوري .. وهزت ثباتي
واسترسلت .. معها نسانيس وبراد

واستفردت بي.. لين بلت شفاتي
واستنزفت .. كل الغلا .. والتوجاد

هدت شغف نفسي .. وكفت سباتي
وارخت علي العطف .. مثل ام الاولاد

واروت ظما عمري .. ولمت شتاتي
وانستني احبابي .. قريبين وبعاد

واستعمرت فكري .. وقلبي .. وذاتي
واقفت وهي برق ٍ مع الليل .. وقاد

وقفت أخيل بروقها .. المقفياتي
ولاني على سبر المقفين .. معتاد

قفتني الحسرة .. ودقت صفاتي
ولادرت عنها .. وكالات الارصاد

راحت وخلتني .. مع الذكرياتي
محروم من ماها .. ومقطوع الامداد

والله .. يالولا كثير الشماتي
لا ارفع لها صوتي على روس الاشهاد

يارغبتي .. ياغايتي .. ياشفاتي
خلي لنا .. لو كان مصدر وميراد

راحت .. ولا راحت علينا فواتي
خلت لها ذكرااا .. تجدد .. وتنعاد

© 2024 - موقع الشعر