محمد بن دغيّم السميري العتيبي
يقولون القصايد قلت هاهي
على حسب الاوامر والنّواهي
اوامر شوق من شقّق غلاها
فوادي لين صار الجسم واهي
وانا قدّام ماعرف المحبّه
وعن درب المحبّه كنت لاهي
وجتني في منامي وأيقضتني
اثرني يابو عايض قبل ساهي
هذاك أوّل ولا كنّه تحوّل
من اللي شفتها وابطيت فاهي
من اللي شفتها وأستيسرتني
بعنق وخصر وعيونٍ دواهي
سواد عيونها موتٍ محقّق
ورمشٍ محفٍ الخدّين راهي
خدودٍ كنها الورد الطّبيعي
وسواد الرّمش للخدين زاهي
على درب المحبّه علّقتني
بحسن أقل تقدير إله باهي
بحسنٍ عنده أحسن حسن ياقف
ولا له لا شبيه ولا مضاهي
غنيّه بالجمال عن التّجمّل
مافيها لا جدال ولا إشتباهي
بعيدة فرق عن كل العذارى
مثل فرق الريال عن الجناهي
لعب بي حبّها والله وكيلك
مثل لعب الصغيّر في الملاهي
وقلبي ماخفق لاحدٍ سواها
ولا أحدٍ غيرها شد إنتباهي
بداية عرفنا يوم إعزمتني
على قهوه يورالي وشاهي
ودامت معرفتنا وأستمرّت
ولا زالت متينه مثل ماهي
معرفتنا على عزّ ومعزّه
بعيد عن الهواتف والمقاهي
بعيد بعيد عن ماحرّم الله
وعن ماكان عنه الدين ناهي
وانا ياحسين بن عايض دخيلك
أبا فزعتك معي وفي إتّجاهي
تحيزم ياحسين وقم بصفّي
لعلّ يجيبها جاهك وجاهي
حسب سلم الميانه والقرابه
أبا المفزاع والرّد الشّفاهي

تعليقات الزوار

  • كُل المحتوي و التعليقات المنشورة تعبر عن رأي كتّابها ولا تعبر بالضرورة عن رأي موقع الشعر.
  • بعض صور الشعراء و الشاعرات غير صحيحة، نرجو تبليغنا إن واجهت هذى المشكلة
  • إدارة موقع الشعر لا تتابع التعليقات المنشورة او تقوم بالرد عليها إلى نادراً.
  • لتواصل مع ادارة موقع الشعر إضغط هنا.
© 2020 - موقع الشعر