قلبي .. وفكري .. وعيني

البارحه .. قلبي وفكري وعيني
ثلاث .. عنّك بالسؤال أشغلوني

قلبٍ .. تواقد به لهايب حنيني
وفكرٍ .. تلاعب به كثير الظنوني

وعينٍ .. تمنّى شوفتك يا ظنيني
من طالت الغيبة عليك اسألوني

واحترت في ردّي على سائليني
حتى تغيّر لون هرجي ولوني

وقمت آتسائل بين نفسي وبيني
وش حيلتي يوم الثلاثة نصوني؟

لو هُم دروا يمناك عافت يميني
وإني نسيتك .. يا ترى يعذروني؟

يجوز قلبي والفكرعاذريني
بس البلا ما يعذرنّي عيوني!

ما دام طيفك كل ليله يجيني
قبل السهر يرخي ستارة جفوني

حتى ولو فكّرت أخفّي كنيني
بوحي يوقّف دون سرّي ودوني

المشكله طبعي مهو في يديني
وعفويّتي تطفي لهايب جنوني

لا جيت أبكذب .. يصرخ الصدق فيني
وإن جيت أراوغ بالكلام اكشفوني