رموز الحماية . صيد أمس - محمد الحلوان الشراري

حبيبتي بين البشر مالها جنس
ما تشبه إلا صورةٍ بالمراية

أستغفر الله كن ما هي من الإنس
حوريةٍ جتني تنوّر سماية

العمر خمسٍ وأربع ٍ فوقهن خمس
هي وحدها بالحب تعرف دواية

جبينها لامن طلع كنه الشمس
شمسٍ لها في مطلع النور غاية

نور العذارى لأشرقت ينطمس طمس
وفي نورها شفنا طريق البدايه

وخدودها ما عودتهن على اللمس
والريق ليت الريق يروي ظماية

وأن سولفتلي تنقلب دنيتي عرس
وأنسى الذي دوني ومنهو معاية

الصوت منها ميزته نبرة الهمس
وطبع الخجل بعيونها له حكاية

متى على الله نشبك الخمس بالخمس
وبإسم الفرح نلغي رموز الحماية

وإن ما حصلي صرت أنا صيد قبل أمس
ونكتب على جرح الزمان النهاية

© 2024 - موقع الشعر