البرواز والصوره

وقفت أبكي عذاب الحب وقفت أشكي عليها الحال
وقفت أكتب بدمع العين أحبك موت يا نوره

عذاب الحب والذكرى من إسبابك عليّه طال
تعبت أسهر تعبت أبكي وروحي منك مخطوره

عواطف حبنا ثارت وهزت باقي الآمال
وهو واقف يناظرلي ولا يبدي علي شوره

عيونه ترسم الماضي وتزخرف لوحة الأطلال
بها العنوان والمعنى قدر وأحكام مقدوره

حسايف خانت الدنيا جريح الحل والترحال
وهزت داخل أعماقي جيوش الحب والثوره

طرالي ماضي أيامه طرالي الشوق والمرسال
أنا والله ماأنسى حبيب القلب وشعوره

وعسى الدنيا بلا شوفك يزلزل أرضها زلزال
ويغيب النور عن دنيا بها الأفراح محصوره

بها العالي يجي واطي يدمّر سهلها وجبال
ويصبح كل من فيها جثث وأجسام مقبوره

عشقتك والهوى ظالم عشقتك والهوى قتّال
ورجيتك لا تخليني غريق الحب وبحوره

رجيتك لو تكرمتي تشوفي دمعي الهمّال
أبي مره تواسيني على أحزاني ومشكوره

عليك الله وأمان الله مدام القلب لك منزال
وسوالف عشقنا تبقى طوال العمر مستوره

بعد ما قلت ما فيني وشكيت الهم والغربال
عرفت إني وقفت أشكي على البرواز والصوره