القصايد

يا هاجسي للشعر شب الوقايد
ورتب حروف القافيه بالمحاني

مادام فكري ينظم أزكى الجدايد
من هاجس ٍ للشعر فز ودعاني

ماني من اللي يشترون القصايد
شاعر وأنا بالشعر جزل المعاني

مشاعري لحروف شعري قلايد
وأغوص في سبع البحور بثواني

وأحب أعسف من الشعر كل كايد
وأعطي على اللي قلت بصمة ضماني

وإن جيت ابنظم ماانظم إلا الفرايد
أبيات ما تطري على المودماني

اللي تجملني بوقت الشدايد
الشامخات ... الوافيات ... الحِساني

متمكن ٍ فيهن وعندي شهايد
وأصيغ منهن للمعالي معاني

يطرب لهن فكر الفهيم المحايد
ورسالتي توصل بلا ترجماني

أنا على عرش الشعر صرت قايد
صح القصيد وصح منطق لساني

نذراً علي إليا نظمت القصايد
إني لأخلي الشعر يثبت زماني

ماهو غرور ولا وساطه جرايد
ولا هو قصورا ً في فلان وفلاني

ما أقول أنا وحدي زعيم ٍ ورايد
الناس واجد بس أنا لي مكاني