همت مع ذكرياتي - متعب بن مضيان العطاوي

انا مخبر حد ٍ مثلي ضحك راضي وهو زعلان
ضحكت بلا عجب واللي مضحكني مبكيني

ضحكت وضحكتي بين الضماير مالها عنوان
بكيت وعبرة اشواقي من أعماقي تواسيني

خذتني لهفة الذكرى وانا في عالم النسيان
وعدت وعودتي للي قبل ذكراه ناسيني

اقلب صفحة الماضي بقايا كان يا ما كان
عسى حيٍ زعل يرضى وانا برضاه يرضيني

اتوق لسالف الذكرى واداعب ثورة الوجدان
تباشير الامل في ملتقاها اكتب عناويني

همت مع ذكرياتي ذكرياتٍ في حياة انسان
نديم احساس ذاتي في معاناتي مخاويني

بداياتٍ مضت فيها لمفهوم الغلا برهان
عجايب في بحر دنيا غرامٍ ما يوافيني

تذكرته سنا يومٍ يبدد ظلمة الأكوان
حضنت الليل من خلفه بهيم اللون ياويني

سقاك الله يا ليلٍ غمرني في خفوت ولان
تحدر من ضياه وتاه عن دربه يناديني

أخذني في ظلامه واشرقت شمسه على البيبان
غياهب ظلمته فيها تعابير ٍ تسليني

يجازف به فتون ٍ في المفاتن واسمه الفتان
يداعبني سنا يومه ومن ليله يماسيني

توشح بالذهب يومه ورى ليله يشع ألوان
على طلة غداة الصبح احس الليل ممسيني

على خده على قده تجلت قدرة الرحمن
على أنغام الحنان اللي مع أنغامه يغنيني

© 2024 - موقع الشعر