أعطني ذكرياتي

ياصديق(ن) كانت هروجه تبين لى صديق
تنحنى له كل كلمه لا أستلم راياتها

يستثير الصدق مدري يجمع احساسه رحيق
والحقيقه كل كلمه مخلف(ن )نياتها

ياصديق(ن) كان صدره غبة البحر العميق
ماسكنها الدر مره ولا عرف غباتها

جيت خادعني زراق الموج والجو الرقيق
ويوم غصته قمت ألوم العين في نضراتها

قلت والصبر يتنفس من عروق القلب ضيق
ياصديقي هالليالي من أمن غراتها

ياصديقي خل قلبك من مغاليقك يويق
قبل ماحي المشاعر يلتقي بأمواتها

للأمل باقي يدين(ن) تمسح الماضي اللفيق
جايز(ن) للنفس حسنه تشفع لسياتها

لأجل خاطر ذكريات(ن) عشتها بأول طريق
يوم رجلي للصداقه سيرت خطواتها

أنتهيت الحاضراللى ينقض الجرح العتيق
في ضلوع(ن) كل مانسنس تجر أهاتها

وأبتديت الماضي اللي جعل عيني ماتفيق
لا غفت بين المواجع وأذكرت مافاتها

ذكريات(ن) كل مامرت على فكري تضيق
بواقع الحال الجديد اللي كسر مرآتها

ليتها ماخلدت للحزن معناه الدقيق
وليتها مافرقتني قبل ألم أشتاتها

ويوم عود صوتي المبحوح يجمع مايطيق
من ظنون(ن) ليتها مابينت خملاتها

قلت والصبر يتنفس من عروق القلب ضيق
آخر رجا قبل الصداقه تنطوي صفحاتها

ياصديقي هيه ياللي كنت لى أغلى صديق
كان عندك ذكرياتي لو تكرم هاتها