اناطيقن الضاد ضيعتوا الضاد - ماجد بن مغيرق العصيمي

اناطيقن الضاد ضيعتوا الضاد
لغة بني يعرب بمحكم كتابه

ولغة نبي الخلق وتقواه والزاد
ولغة هل الجنه نهاية حسابه

من بطن مكة شعشع النور وإنقاد
بقيادة الهادي وجل الصحابه

بأولهم الفاروق وحمزه له إسناد
وأول مصدق للنبي وإقتدابه

في بيت الأرقم مشعل النور يزداد
لإظهار دين الحق ومفتاح بابه

وأخذ عمر قوسه وحول مع الواد
وقريش تخشى هيبته وإرتهابه

وقال الذي وده ييتم له أولاد
يلحقني بجال الشعيب وجنابه

وهاجر نبي الخلق يتلونه أفراد
وإستبشرت طيبه مقدم ركابه

والأوس والخزرج تهلل وتنقاد
وتعلن ولاها يوم جا وإلتجابه

خاضوا بغزواته في حروب وجهاد
وقضى على أهل الشرك وكر الحزابه

وأهل الجزيره وحدوا والأمن ساد
وأقام شرع الله وحكم كتابه

وبلغ بدين الله على روس الأشهاد
وأرسل مناديبه وعمم خطابه

لكسرى وهرقل والمقوقس والأفاد
وعادت مناديبه بدون إستجابه

وجهز ثلاث الآف جندي بالأعداد
للروم في مؤته وعالي هضابه

يقودهم زيدٍ وهو خير من قاد
ثم خلفه جعفر وروحه فدابه

وبن رواحه ياخذ الرايه وساد
ثم خلفه خالد وغطا إنسحابه

بالميمنه والميسره جند أجداد
ومقدمه ومؤخره في عقابه

من واقع التاريخ نقرا بالأمجاد
سيرة رجال المجد وأهل المهابه

في طاعة المعبود ركع وسجاد
رجال تعبد الله وتخشى عقابه

وين الرجال اللي للأمجاد رواد
أمثال سيف الله وراع العصابه

وأبو دجانه يوم أخذ سيفه وذاد
واللي لهم بالفتح دور وصلابه

والمعتصم للناخيه عد الأعداد
وأخذ بثار اللي زهم وإنتخابه

وين المثنى وين يزيد وزياد
وعمرو وابن وقاص واللي حدابه

وين بن الأسود والملقب بمقداد
وينه معاذ وجيشه اللي غزابه

وجيش العبادل يوم كلف بالإعداد
حطم عروش الروم يوم إلتقابه

وأسباط سيدنا وهو خير الأسياد
سادت هل الجنه وسادت شبابه

لفتح شمال جيشاً امداد
لابي سرح وابن الزبير استنابه

عاشوا بكروفر وحروب واجهاد
تحت سماه وفوق عالي ترابه

وصلوا الى النهربن ودياراً ابعاد
والصين واقصى الصين حتى انتهابه

ودار البخاري والنسائي والاكراد
ودار الخوارزمي ومن قد مشابه

وصلاح الأيوبي بعقل وتركاد
اللي حمى الاقصى وطهر جنابه

من رجس قوم الزندقه والتجلاد
طهرتخوم الشام وذلل صعابه

حمو حمى الاسلام يوم الله اراد
ودكوا كنايسهم من اعلى قبابه

لهم الفخرواللائمه جت للاحقاد
والجبن والخذلان خيم سحابه

بقلوبنا هم وغم وتوجاد
على مشاهير العرب والصحابه

تواردت فكري تماثيل وانشاد
واحترت مابين السؤال وجوابه

للشعر دور وفن واسلوب وابعاد
والشعر ياهل الشعر فن وذرابه

وللشعر ياهل الشعر مصدر وميراد
من واقع الأحداث واللي قرابه

بلحون من مكنون توجات وراد
تقفي وتقبل واللسان ابتدابه

مالي جدي الا الشعر وسيفي بالاغماد
على مخطوره مقايض نصابه

من قوم يس وي زاد الخطا زاد
اهدافكم تحققت بالاصابه

أخبار ماتفرح ونظرات بعاد
من كافر في عز بادي شبابه

زنديق متغطرس وملحد وجلاد
سلالة يهود مالقاله مجابه

قام يتهبد في عربنا تهباد
مع كبرياه وقامته وانتصابه

مع زمرة الليكود واقلام موساد
ومناورات الدجل نهجه ودابه

يضرب بسيف الغير بعنف وتمراد
وعريبيا ماهوب حاسب حسابه

من كل حدب وصوب نرمى بالأحقاد
حقد يكال لنا من احبث عصابه

قامت تناهشنا من الغرب حساد
ودب من المشرق يكشر بنابه

حرب صليبيه وأهل فكر أبعاد
وأطماعهم بالشرق كل درابه

وحنا نطبل دون توجيه وارشاد
وتفرض علينا الهيمنه والرقابه

ونشاهد التلفاز ونسمع من الراد
ولانستطيع نقول للعرب جابه

نشجب ونستنكر وبالصحف نقاد
والفعل مامن فعل عند اكترابه

عرب هويه للملذات رواد
ولافكروا بأرض الوطن واغتصابه

افكارهم متشتته مثل الأوغاد
يطعن بعضهم بعض ويلعن سبابه

بتهديد وانذارات وشتم وتوعاد
على المنابر والخطب والخطابه

عبر الإذاعه بالصحف جد واعماد
هذا يحكي بهذا والاخر حكابه

من نكبه بنكبه هذا شيء معتاد
فيروسهم ماله طبيب وطبابه

لو صوتت مكه للأزهر وبغداد
واهل اليمن والشام بالإستجابه

والمغرب وشعب الجزاير جو امداد
وطرابلس والقيروان وشبابه

وشعب الخليج إلتم ونادا به مناد
وتضامن السودان واللي رعابه

وكراتشي مع كابل وحييدر أباد
والترك وتركستان واللي ربابه

والبوسنه والهرسك وذيك الأنجاد
ومن دينه الإسلام يحسب حسابه

من أقصى فريقيه ليا دولة تشاد
والهند وأهل السند واقصى تبابه

بتكبيره وتهليله وزند وزناد
دفاع عن القدس وطرد العصابه

بجحافل منها العدو يلبد إلباد
مثل النعم بين الحماد وشعابه

بكلمة هل التوحيد نحصدهم احصاد
ونرمي جثث هم للسباع وغرابه

على عقيدة صدق ماناقف احياد
والنصر مكفول بمكحم كتابه

لو يلتحم مليار مسلم بتعداد
محا بني صهيون ودمر قبابه

وتراجع الأبيض وخلى التهداد
وتراجع كلنتن وقصر بنابه

كلنتن يواعدنا بود وتوداد
لاعاد يوم فيه تم انتخابه

لعيوننا وعيون غضات الأنهاد
من اجل مضخات البحر واجتلابه

والبيت الاحمر كف عقب التحشاد
بعد التفكك يلسن اللي بقابه

والصبر طال ومعهم الصبر مافاد
والقاضي كلنتن وحكمه قضابه

للصبر حد وصبرنا ينفد انفاد
والقدس تنخانا وتشكي صوابه

وجراحها تنزف ولايوجد أضماد
وحنا كما الشطرنج ولعبة لعابه

تصرخ وتستصرخ ولابست احداد
من جور هدام الكيان وخرابه

تقول وأسلاماه ... وتعض الانجاد
في قبضة اسرائيل وتحت انتدابه

وحتى ايش لو نمشي في جرود واجراد
ماينجلي هم تراكم ضبابه

من سيء إلى أسوى وعميان وارماد
نخضع للأمر الواقع واما جرابه

أوقاتنا كروه من أستاد لستاد
ودش الخلاعه للعقول وذهابه

بعض الشباب جروم وازوال وأجساد
حداه من عن درب القدا من حدابه

لاصنعة باليد ولاأفلح ولافاد
عاله على أهله والوطن وش يبا به

لو طول أشنابه على ماش وش عاد
سايب ومتسيب والأخلاق سابه

معقد وآلا الأمر زاد التعقاد
ويلهي بلهوات الجهل وإلتهابه

مع شلة أهل السوء وأشرار الأوغاد
واجب نحث أولادنا بإجتنابه

الغزو فكري ضد فلذات الأكباد
لجرف الشباب وجرف بعض الشيابه

في كل عالمنا الغزو زاد وإزداد
ماله علاج ولايفيد الدوابه

كتب علينا الذل من كل مصطاد
وصرنا طعام الطير وحايم ذبابه

لو نغتسل بالبحر والنهر مافاد
ماتنظف أردان والوسخ والجنابه

أرض العرب صارت توزع بالأقصاد
وحنان رضيت به وياسر رضابه

وحنا نفاوضهم ونخدع بالأوعاد
وعار المذله لبسونا ثيابه

لو نتوحد صف نخمدهم خماد
ونشعل فتيل الحرب ونشعل شهابه

ياحيف كيف العرب للغرب تنقاد
تخضع لأوامرهم وتحت الرقابه

بعض روساهم من زنادقة الإلحاد
مشكوك في عروبيته وإنتسابه

وش عذرنا من ربنا ياهل الضاد
أمام رب الخلق وبطشت عقابه

مامن قلوب ولاش مر بالأكباد
ولامن ضمير حي يوح الندابه

بقوم تصادقنا وبالباطن أضداد
وعريبيا من كابة ٍ بأثر كابه

حرب صليبيه وللنار وقاد
والمسجد مطوق ومغلوق بابه

مطوق بجنود وسلاح واعتاد
ومصفحات مجهزه للحرابه

بأمر نتنياهو وجمهور موساد
في هضبة الجولان يشهر حرابه

نصب صواريخه ورادار وأرصاد
ويهدد وينذر بحرب ونشابه

فازوا بها واللايمه جت لمن حاد
وإنصاع للخذلان والإكتئابه

روس اليهود اهل الدسايس والأفساد
والبيت الأبيض مرجعه وإحتجابه

يبني في الجولان ويدق الاوتاد
وحنا غدينا للصليبي نهابه

لو فيه شمس من أمس جاله توقاد
في هضبة الجولان واللي بنابه

من مؤتمر وحنا نوم ورقاد
واحلامنا مثل الهبوب وسرابه

مانتعض من وعد بلفور ياطراد
وخطط بني صهيون والإنقلابه

لو يعلن القاده لنا حرب وجهاد
لتحرير بيت القدس عقب استلابه

على نمط عمر وحشده للأجناد
اللي وصل تل المكبر وجابه

بعزم وحزم مافيه جبن وترداد
لتحرير بيت الله من اللي غدابه

مفروض نعتزل النساء والتوساد
ونخجل من الله والنبي والصحابه

ونضرب عن اللذه ونضرب عن الزاد
ونمشي سوا للقدس صف وحزابه

القدس تشك الجور وترصف بالأصفاد
وتلعن نتنياهو وأبو من زنابه

بيقن يقول الهم في الأرض ميعاد
يحتج بالهيكل وضيع صوابه

هيكل سليمان الذي بيد وباد
زاله مهب الريح مع من غدابه

وبادت طسم وجديس وثمود مع عاد
وهامان مع فرعون ماأحد ٍ بقا به

قبل ثلاث الأف عام بالأعداد
ومية سنه برواية اللي روابه

قبل المسيح ولاش تاريخ ميلاد
بقرون ماتحصى ونجهل حسابه

بعد سبي بابل جماعات وأفراد
غدوا شتات وذاقوا أقسى عذابه

أرض العرب من قبل عنتر وشداد
عصبة بني كنعان مابه طلابه

من غربي المغرب ليا شرق بغداد
مهد العرب مافيه شك وغرابه

ماله في أرض العرب ملجا ومقعاد
دنس تراب بلادنا اللي وطابه

القدس تبغا ناس لله زهاد
ماقلدوا بقين ولبسوا ثيابه

ماهم سوات اللي للأصنام عباد
نسيوا عقيدتهم ونسيوا كتابه

مثل النعم تسرح وتمسي بالأوهاد
تحت جناح وسط الزرابه

عاشوا بسوق العربده والتعرباد
وميدان شهوات الجهل والخيابه

مكبلين بين صايد وصياد
في هضبة الجولان وسينا وطابه

من المستحيل النصر من غير معواد
معواد للمعبود ورجوى ثوابه

مايعبد مع الله تماثيل وانداد
ومن حط لله ند يلقى عذابه

لابد من يوم يددهم أبداد
في ساعة الأهوال وإلانحطابه

لعبوا على اطفال الحجاره بالأوعاد
واستوطنوا بالأرض وتم أكتساحه

وسلامهم صوري وجمد تجماد
وأمالنا خانه ولافيه ثابه

لو اشتهوا حل النزاعات ماكاد
حطوا لهم بالقدس وكر ونقابه

مسكين أبو عمار وش عاد وش عاد
يحلم بعرش رياسة ماإرتقابه

مابين ذاك وذاك سرداد مرداد
هذا يخطط له وذاك إختلابه

صلى على رابين وشارك بالأعياد
اعياد مبتدعه بزيف وغرابه

ماتفلح وجندك عن الحق صداد
حلمك سرابه من خدعك وسرابه

مابين غار ونار مشدود بقياد
ولامن صلاحيه ولامن مهابه

برحله مكوكيه من بلاد لبلاد
وساع البريد أخفق مع اللي سعابه

عمرلك أرقيله وسو لك براد
وهات الكمنج وجر قوس الربابه

وإلا أدخل المسجد وصل التهجاد
واقرا في السبع المثاني وبابه

اقرا بصورة فاطر وغافر وصاد
واقر في المصحف مع اللي قرابه

خدعك حزب البعث وسعدون حماد
وهويت مع صدام باللي هوابه

من الخلق والأخلاق مجرد تجراد
وخيب رجا شعبه وخاب الرجا به

وانته تعر فالحزب وكر للإفساد
مؤسسة عفلق وزمرة كلابه

تبي حكم ذاتي وسلطة ومرقاد
عنك أبعد من الشمس وموقع مغابه

مالك مطير ولامنير اجلد اجلاد
في قبضة كلنتن وحامي عقابه

محصور بين ثنين مافيه مشراد
مثل الطفل مابين مامه وبابه

ازبن على ال سعود خل التمجاد
سور البلاد وهم ذراه وحجابه

من بطن مكه تعلن الحرب وجهاد
على بني صهيون وجيش العصابه

بصوت مجلجل للعروبه ورعاد
والراي لآ ل سعود مفتاح بابه

وانخ الفهد يدعمك بسلاح واعتاد
وتسعين فوج من قبيلة عتابه

بين القبايل مالهم ند وانداد
وباق القبايل كلبوها تشابه

لطامت العايل وللموت وراد
وذباحة للحايل للضيف وصحابه

نطاحة البارود من دون الأذواد
وحرز الدخيل ليا زبن وإلتجابه

عتيبه الهيلا لها الضيف يرتاد
فكاكة حبال النشب والنشابه

مع دولة أل سعود من عهد الأجداد
ماتنهزم رايه وفيها عتابه

عز الصديق وضد لكل الأضداد
تشهد لها نجد وشوامخ هضابه

في وقت بن هندي وتركي لها قاد
ومسلط وسلطان مقادم عتابه

مثل القمر بين القبايل وهو باد
ولها مكانتها وعز ومهابه

قبيلة ياوي قبيلة لها أمجاد
لادق زار الحرب ماتنتجابه

وإن جاء نهار فيه مطرود وطراد
عدوهم ماينتعالج صوابه

وإليا لفيت بيوتهم تلقى الأجواد
وكلمة هلا للضيف ويامرحبابه

أشرس قبيلة للمعادين وألداد
وبالطيب والفزعات ماله مشابه

أهل الخيول السرد وسيوف حداد
كم شيخ أخذوا عطفته من زهابه

لو توزن مع أقرانها وزنها زاد
هيلا ليا إنهالت ويحسب حسابه

رجالهم صياد ماهوب ينصاد
يضحك حجاجه دوم لين جنابه

أقولها وأصدق بماقلت يابجاد
بشهادة الأسلاف واللي روابه

ماهمها من قال ترديد الأنشاد
لازالت عتابه وتبقى عتابه

بالماضي وحاليا الطيب يزداد
وبيوتهم من جاه يلقى العشا به

أولاد بكر بن هوازن والأحفاد
وبني سعد ساس النسب والنسابه

منهم خوال المصطفى سيد الأسياد
من الرضاعه دون شك وغرابه

وبني هلال إخوان خالد بالأوكاد
أمه هلاليه وتدعى لبابه

لبابه الصغرى بنت الحارث الجاد
في معجم الأنساب وكتب النسابه

لهم بشمال إفريقيا دور واجهاد
بني هلال وجشم وعقبه بقابه

انهل من أصحاب السير علم وارشاد
ماهوب هذر وسفسطة من هذابه

كلام موثق ومسند بالإسناد
ماأخذ من أفواه العوام وكذابه

مانستمع من كل جاهل وعرباد
ونهاية الجاهل على ماإنتهابه

ماكل قصاد يقال له قصاد
ونصدقه فيما نشر وإدعابه

بني سعد قرنة عتيبه والأجداد
بجوامع السيرة وصفحة كتابه

مافيه شك ولاشكوك وترداد
ومن كان واهم نقنعه بالإجابه

ماهو كلام أحمد وحامد وحماد
والكذب خيبة من كذب وإفترابه

ماقلتها ناقد ولانيب نقاد
والعلم ثروة من درس وإعتنابه

أبحث وأناقش واتركد تركاد
والله يعلم بالخطا من صوابه

نبذه عن عتيبه وذكرى للأولاد
من ماضي الأزمان واللي مضابه

وشمر لهم سطوة واهل باس وعناد
وجمع البقوم وحرب وحرث شبابه

ومطير أهل وقفه وأهل خف وجياد
من الحرة ليا أرض الحفر واللهابه

واولاد وايل مرغمة كل حساد
وقحطان والغلبا عز من اعتزابه

وجمع الظفير اللي لهم كار وشداد
اهل البيوت مزبنة من لفابه

وثقيف حرز وركن واركان وأعماد
وجمع بني مالك سند من تلابه

وجمع الفضول دوروع وسيوف وأعضاد
تاطى المخاطر مثل شهب الذيابه

سلالة بني لام الهم أذكار وامجاد
وتميم لادقت طبول الحرابه

وجمع بني خالد كما وصف رعاد
سيل ليا دم له وادي غدابه

وجمع السهول ويام قيف ليا قاد
باولهم العجمان ماحد يهقابه

واهل اليمامه مثل نو ْ ليا انقاد
واهل القصيم مطوعة من نوابه

وجمع اكلب وشهران ودوسر هل الواد
مثل الجبال وغابة سد غابه

وسليم وقضاعه ماأفندهم افناد
وهذيل ورجال ألمع ومن حذابه

وزهران مع غامد هل الباع والماد
مثل الخيال ليا ضفى مع ضبابه

وجمع رجال الحجر تاقف بمرصاد
وبالقرن مع شمران قوة ولابه

وقبايل الأشراف للهادي أحفاد
رجالهم ينطح جمع لل إلتوابه

وجمع البواهل من بني زيد الأنداد
مثل الرمح والسيف سلة نصابه

وجمع بني هاجر والمره له زناد
عدوهم مايهتني في شرابه

وبني عطيه والحويطات هداد
تهد هامات العداه ورقابه

وجمع الحوازم والعوازم ليا انحاد
سوق الوغى قد باع به وإشترابه

وجمع الشرارت لهم أفعال وأجواد
للمعتدين أعداء وعز القرابه

وبني رشيد حيود ماهيب تنحاد
لاصار يوم فيه غلب وغلابه

والمملكه شعبه ليا أوحى له مناد
يفدى بما يملك وروحه فدابه

اهل الفتح منا جنود وقواد
واول سهم بالدين واللي رمابه

لله عباد ٍ ولرضاه زهاد
نصوم ونصلي ونرجي ثوابه

مانعبد الأوثان واحجار الالحاد
مثل الذي يعبد صليبه وكابه

لو نتجه للقدس بضمير وافواد
قلب وقالب لين ندخل رحابه

بهجوم معاكس على القدس من غاد
لتحطيم جيش الغدر عند إقترابه

بنصراً محقق كان رب الملا راد
وكان إنخذلنا الله شديد عقابه

والخاتمه صلوا على سيد الأسياد
سيد من أيد سيرته وإقتدابه

© 2024 - موقع الشعر