ياسعود

ياسعود قفى لطيف الروح من جده
وانا على شوفته ياسعود شفقاني

لاواهني من يحط ايده على يده
عزالله انه يعيش العمر طرباني

راع العيون الكحيله مورد ٍ خده
الطول زاهي شبيه العود رياني

حمر الشفايف لهيب النار مشتده
من ذاقها مارتوه ياسعود ضمياني

والشعر الاسود شبيه الليل لاكده
ضافي على متونها والزين رباني

امن اول ٍ ماينام الليل بمخده
عادته يغفى على متني وذرعاني

واليوم غايب لطيف الروح له مده
خايف يطول غيابه ثم ينساني

ياسعود ودي بحله لعنبو جده
وشلون صدق لطيف الروح عدواني

ياوجد حالي على من بيح ٍ سده
اللي درى بعلته قاصي مع داني

ياسعود ماكان يطري لي ابد صده
وشلون يتبع لطيف الروح نصراني