ودي

لـ فيصل السواط، ، في غير مُحدد

ودي - فيصل السواط

ياليال الشوق لا نادى المنادي ردّي لا تخلّين الفراق يهز لي بكتوفه
يعلم الله ما تعنى في الحبايب قدي لو يكون لكل حب بهالزمان ظروفه
الهوى يلعب بقلبي والمطر في خدي والفرح ماكنه الا ريشةٍ منتوفه
والهبوب يسوقها وتمرني وتعدّي غيضةٍ في واحدٍ كثرت عليه حسوفه
ياسعادة قلبها حرّك سنابل ودّي يمكن اتحس وتذكّر قلبي ومعروفه
ااه ياريحانتي ياوردتي يانَدي يشهد الله ما بقى فالوقت غير كفوفه
من رحلتي والليالي كل بوها ضدي والسعاده بنت ناس من الصدر مخطوفه
والحياه اخذت مزوحي في سلاسل جِدي والمشاعر شكّلت في خاطري معزوفه
لاذكرت (اشلون) ولاّ (يوه) ولاّ (بدي) راحت علومي على البصره وانا فالكوفه
لين صرت اجيب في ذكرى الهنا واودي والمشاعر صادقه والذاكره ملقوفه
صدّقيني ما كسبت الا خسارة صدّي ولا خسرت الا مكاسب حاجرك وسيوفه
قلت ماودّي صراحه.. والصراحه ودّي لو تردّين الذهب فالصُّره الملفوفه
وانتي ادرى مين ! عن كل الحياه أبدّي وانك أغلى عند قلبي للعمى من شوفه
والوفا يبقى ولد عمّي وعهدي جدّي والمحبه جذرها في كبدي الملغوفه
كل حاجه في يديك ولا بقى في يدّي غير اقول الله يفك قلوبنا المكتوفه
© 2024 - موقع الشعر