يسألني..حبيت؟ - فهد معتوق

انا سبب نفسي ..و م الوقت شكّاي
و انا الذي لمْت الزمن يوم حبيت

ما للزمن ذنب و خطّيه ولا راي
دام العقل صاحي .. انا اللي تجنّيت

غيري يلاقي في سراب الوطى ماي
و انا غدير الماي ينشف اذا جيت

هذا نصيبي من وطت رجلي دنياي
مولود حي و حظي بداخلي ميت

ياما طلبت الحظ يثمر بمسعاي
مير الزمن جاوبني ما تفيد ( يا ليت )

خلك على مجنونك و خاف م الجاي
لايجيك العن منْه و تقول جنّيت

ما كل شي ٍ سال .. للنار طفّاي
النار كيف النار نطفيها بالزيت ؟!

شوف اللي أكرم ( بوش ) .. و ( صدام ) باي باي !
اليوم فوق الجوع .. عايش بلا بيت !

لا ترتجي لحن الفرح يعزفه ناي
الوقت ما يمشي على ما تمنيت

ولا تهتوي كف ٍ لأنه محنّاي
شفني من سيول المدامع تحنيت !

اصعب سؤال يجيني من شخص وياي
يسمع قصيدي.. و تالي يسألني .. حبيت

© 2024 - موقع الشعر