عـذروب قلبي ياهل الطيب طيبه - فهد السلمي

عذروب قلبي ياهل الطيب طيبه
وكم مرةٍ ينسى مواجع مع أمراض

يدمح مواجع والمواجع مصيبه
وينسى خطايا أطوال واطوالٍ أعراض

لكن عسى الله ثم عسى الله يثيبه
ويعوضني ربي وترا الرب عواض

ماهوب ضعفٍ بي ولاهيب غصيبه
ساسي يخليني مثل نجم نواض

أمشي ودربي ماذكر فيه ريبه
من فضل ربي ماتلحقت الأعراض

ولاذكر بفضل الله قبلت النهيبه
ولارضى الدنس ولاقرب خبيثين الأحواض

ولاجلس بمجلاسٍ رديٍ حكيبه
ولاقبل مثل ماقيل حفنه من أنقاض

ولاحط بين الناس بغض ونشيبه
ولاقبل لربعي غير راياتٍ ابياض

والجار له عندي مكانه عجيبه
وكم قبلنا وصى على الجار وعاض

وللوالدين أخفض جناحي وأهيبه
ويالله تجزاهم من الجنة أرياض

وأحب أنا ديني ومنهو مشيبه
وحب الوطن فيني على طول فياض

وليا أرتفع صوت المواذن أجيبه
وقال الصلاة..... قلت لبيه أنا واض

أهم شيٍ في حياتي كسيبه
إني أقابل خالقي وهو على راض

© 2024 - موقع الشعر