ياحمام ٍ هيـّض الشعار صوته يوم غنـّا - فرح بن هلال العضياني

ياحمام ٍ هيّض الشعار صوته يوم غنّا
جر صوته واستهاض القلب من جرّة حنينه

قام يعزف باللحون اللي كما نجر ٍ يدنّا
يجذب السامع لصوته لو بعد راحت سنينه

شاقني صوته وأنا وسط الرياض اله أتمنا
أتمنى شوفته وأعطيه وآخذ من رطينه

بالمثايل والبيوت اللي لها فالوقت فنّا
والسفينه مالها ياكود ربان السفينه

حط له وسط القصيم أذكار وبيوت تبنا
جعل بيت العز يبنى دوم وأركانه متينه

مايهزنه عواصيف الدهر منا ومنا
ثابت ٍ مثل الجبل ماكل عاصوف يشيله

كل واحد من حموله والسعد فيهم أملنا
ليت ربي يحفظ الاثنين وبدربه يعينه

واحد من آلاد ثعلي عزوتي داخل وطنّا
حظ منهم عزوته يوم المثارى والغبينه

يبردون الحر بسيوف من الاعدا تحنا
في نهار فيه ترخص كل الارواح الثمينه

والمخاصم خصمهم يرجع على راسه مثنا
مايفيده لو تقدّم بالمحابيل اللعينه

وأذكر الثاني وفعل أصحابنا مافيه ظنّا
فعلهم بالطيب نشهد له وحنّا خابرينه

من بني عاصي رجال ٍ فالمواقف ماتونّا
تبذل الاحوال والاموال والفزعة حصينة

الحرارا في مواكير الحرارا ربّينا
والصغير يشوف ابوه ودينهم يصبح لدينه

دوم فالطالات مانهتم لو يتعب جملنا
والجمال تروح والطيب ترى ذكره عوينه

من مشى فالدرب يحذر كل ذيب ٍ حد سنّا
يحتسي له حسيته وان جاه يرفع له يمينه

عقبها يارد مواريده ويسري لن سرنّا
وانتبه مافيه رجال ٍ يوفّي كل دينه

لاتسوّي مثل من يقرع سواة اقراع شنّا
وآخر المشوار يرجع منه فارغة ٍ يدينه

الرجال الها مواقيف ٍ عليهم تفرضنا
تجعل الرجال يفدي كل ماجوب ٍ بعينه

مثلكم ماينتوصا مير للتذكير قلنا
الكم عيونٍ تشوف الناس وقلوب ٍ فطينه

والختام أحلى كلامي والتحيّه يرسلنا
مع عبير الشوق للصاحب وربع ٍ حاضرينه

© 2024 - موقع الشعر