فتلت لي حبلٍ براسه فتيله - فراج بن وسويد الكرشمي

فتلت لي حبلٍ براسه فتيله
ونقضت لى حبل معقد ومفتول

منول أمشيله بحيله وحيله
واليوم يمشيلي على العرض والطول

ما جاء على كيفي بيوم وليله
ولاجاء على كيفي على داير الحول

سنين أعدل كل ماشفت ميله
واقرب من الزحمه ليا شفتلي ضول

حتى على شاطي فراته ونيله
وقفت لاهايب ولانيب مذهول

وشربت ( شرب الهيم) من سلسبيله
وجمعت منه الحص والدر واللول

احرص على جزله واخلي هزيله
واقدمه واقول عساه مقبول

شعري وانا عن ما يعيبه كفيله
وعن العبث في عرض من غاب مكفول

اسرجت به قب المهار الاصيله
واخذت في ميدانه اصول واجول

فالدرب ما ابغالي خوي ودليله
ولاقلت مالي فيه قوه ولاحول

رفعت صوتي فوق راس الطويله
ما ادس راسي بين جاهل ومجهول

اجلس بجنب اللي يحوش الفضيله
اسمع لقوله ويتسمع لما اقول

أخايل نجوم بعال المخيله
ولي بنجم الجدي عبره ومدلول

واقرأ حكايات ألف ليله وليله
واحل لغز كان ما هوب محلول

ما عذبني ناقضات الجديله
نجل العيون اللي لهن ليّن القول

المترفات دواء القلوب العليله
عنهن صرفت القلب ما نيب مسؤول

ما عاد لي فيهن صالح واجي له
باب الهوى حطيت له شمع وقفول

تم النبا وازكى صلاة ونفيله
على محمد خير هادي ومرسول

© 2024 - موقع الشعر