المحبه حبل وصل وكل خايـن يقطعـه - ابراهيم الزراقي

المحبه حبل وصل وكل خاين يقطعه
والخيانه جرح ماله لاعلاج ولاطبيب

والمفارق سم والعربان صارت تجرعه
والجروح انواع منها مايسمى بالعطيب

والمثل قال الزمان انكان ماطاعك طعه
والمآسي تجعل الانسان في داره غريب

والله اني كل ماشفت الطيور موقعه
ماذكرت الا الحبيب الي يسولف مع حبيب

يوم طارت كل واحد له خويٍ يتبعه
قلت ليت الناس تنضر فيك يالطير العجيب

ليت كلن يوم يرحل ياخذ احبابه معه
كان ماعذب صدور الناس جمرن مع لهيب

ياحبيبي ليت حبٍ طاح ليتك ترفعه
لين يبقالي مع العشاق حظٍ مع نصيب

لاتعيشني مابين هموم مع ضيقة سعه
ولاتكدر خافقي والهم عني مايغيب

ياوجودي وجد من فارق فهالدنيا اربعه
فارق اهل ودار ثم فارق حبيبٍ مع صحيب

وياوجودي كل ماشفت الحياه مودعه
وجد من راهن حياته في جروحن ماتطيب

وياوجودي كل ماشفت الهموم مجمعه
وجد من شاف الخيانه من رفيق له فريب

© 2024 - موقع الشعر