أبيات يتيمة

جيت دون الشوق أرثي مامضى
وأشتكي بعد التحية لك عليك ..

ليه ماتعفو ولاتطري الرضا..؟
شِف عتابك صار هو (كل ما لديك)!

حاولت أشرح ظروفي كيف هي كانت
وحاولت أواصلك لكن صدّك امعيّي

لو تدري قد ايش غادة بغيبتك عانت
راضيتها رغم غيضك يابعد حيي

لو كان ودّي أرد الجرح ردّيته
لكن بطبعي أجنّب غيري آلامي

وآخر كلامي يأوّل شخص حبيته
عادي تعوّدت أقضي دونك أيامي

اختطفني من حدود الخوف واهموم الحياة
عدّني للعشق والأشواق عندك محتوى

انت قدري انت صدفة ساقها ربي وجات
انت بدرٍ في سماي المظلمة شع الضوى

لايهمك مامضالي من فصول وذكريات
ماهي معقولة تكون الناس نفس المستوى

ما أبي أذكر وأعدّد لك جروح
خلّنا بعد المفارق أصدقا

ريحة الخذلان من دربك تفوح
وآنا مو قد الشقا / مابي شقا

ردّ لي قلبي إذا ناوي تروح
ورجّع التاريخ إلى قبل اللقا

احتويتك في خيالي ثم غفيت
ياحلات الحلم جمّعني معاك

يوم تندهني وأردد جيت جيت
واختفينا بعالم العشاق ذاك

أؤمن بأن الله ياخذ ويعطي
ومابي أكون إنسان مايشكر وفظ

وأدري بأن الشي على الشي يغطّي
مثلي أنا لو ويش أسوي "بلا حظ"

لاتلوم الوقت ي اللي ضيّع الوقت ابجفاه
قولها لي بالصراحة : ما أحبّك .. ما أبيك

شفتني أغرق ف حبّك شلت أطواق النجاه!
الله ما أقسى طباعك .. ويش تعرف عن نبيك؟!

تعتذرلي ابداعي ضعفك .. ناسي وضعي ك فتاه ،
أي ضعف تقول عنّه؟ للأسف عذرك ركيك