سلام الله سلام

سلام الله سلام .. ما يساق الا على الغالين
سلام .. فيه ريح العود والكمبود والجاوي

على اللي لا اجفلت مني ... وسااااقت عمرها .. في ثنين
تقول انها تساوي القاع لو ما هوب متساوي

ليا ناظرت مشيتها ؟ يضيع الفكر بين وبين
طراوة قدها .. اللي يرتمي في عودها الراوي

وجدايلها .. على الامتان كنها تذكر الناسين
بشلال القصيد اللي حكاه الفن .. الابهاوي

وسيلة حرب .. لو استخدموها (فتح) في جنين
يجوز ان حال فلسطين هاليومين متشاوي

عليها رمية البندق تساوي طعنة السكين
تنشل من بعيد وقعها حامي ومتقاوي

عليها الله .. لو تأمين عليها (شركة التأمين )
تنغنغ جيب طارفهم وهو له مدة .. خاوي

سمو أميرة الزين الخليجي من ثلاث سنين
وهي الاول .. على الاول.. على الاول .. ولا تأوي

هواها مسور قلبي بسور مثل سور الصين
وأقاويه .. يتخطى السور واثره ماهوب .. متقاوي

يخمن من يخمن والا .. انا ما اداني التخمين
رماني حظي الطيب على تفاحة الغاوي

تسجل اسمها في ذلقة لساني بلا .. تنوين
كأنها تخالف ( النحو الوظيفي ) جعله اللاوي

خذاني مدة راحة وعرفني على ثنتين
مقالات ( لطلعت حرب ) وأبيات ( لغزاوي )

وخذاني حبها جاهر وهي .. باقي على التمرين
ذكاها محترف والا بقية جسمها .. هاوي

يراودني .. هواها يحسب اني ما عرفته زين
ولا يدري بي اني قد سبقت ( الشيخ قرضاوي)

بتقديم النصايح للهواه اللي عليهم دين
لبنك الحب ما دام التعامل صار بنكاوي

هذي .. ربي عطاها مني ومكن لها تمكين
تمشت في قفار القلب واجنب ذيبه العاوي

اذا بالرقه .. وسحر الانوثه .. وين يا بو وين
اناملها على صدر العنا جراح ومداوي

واذا بالزين .. ولباس الاناقه .. يووووه يخزي العين
امانة وجهها يسدل عليها ليلها الضاوي

جمال من يشوفه قال جلت فكرة التكوين
جمال صانه الرحمن يخلف نية الناوي

يقولون : اتحكم في عقول الناس من عامين ؟؟
وتوفى من سببها اثنين .. والعهده على الرواي

وانا .. اقول الحكي فيها مثل .. من يطرد المقفين
ملاك في خفوقي .. ذابح الشاتين ومخاوي

لو ان سلاحها الجذاب عادي سقت نفسي لين
احضر في قلايعها .. لاشك سلاح كيماوي

جبرني .. انثني واعابش الواقع .. يا مال الشين
وفنجال الهوى .. ما ينشرب في مجلسي ثاوي

غلاها تلني في بيكب طرادته .. عشرين
لكن سواقه ابيض كف .. والماخوذ تسعاوي

كفايه .. لو حصلي ما حصل لاسرة (حميد الدين )
اقول الكون من دون ابتسامتها وش يساوي

سلام الله عليها .. كل ماراحت يسار يمين
وداعبها نسيم في جنوب الدار .. شرقاوي

سلام من .. غلااااته .. ما يساق الا على الغالين
سلام فيه ريح .. العود والكنبود والجاوي