ارس ياغرس عليك النا مهابه - عبدالمعين بن عقل الثعلي

ارس ياغرس ٍعليك النا مهابه
لاتزعزعك الحرايب والوعيده

الحرايب من على عصر الصحابه
مضحيه ويصيدنا والا نصيده

وان قنع بالحق يوم الحق اصابه
وان جزع واللي يريد الله يريده

لاصحيب ولانسيب ولاقرابه
من بديده وانت عنا من بديده

يجتهد فينا وحنا في هبابه
واذبح الضاوي ويذبحك القعيده

لايظن بزود منا ويهقابه
والله انا اقرب لروحه من وريده

وان بغى يقنع على مابي ومابه
وان بغى كتب الافاده مايفيده

وان بغاه يروح يوم وما غدابه
وان بغيت تولع النار الوقيده

علموهم يامطير ويا عتابه
يحسب الرجال يغدي به جحيده

ما ذبحناهم عبث والا غهابه
عمد واللي ماضي منهم نعيده

سلفة(ن)ردت عليه وسد بابه
في الفقيده ما يسد الا الفقيده

جارنا وكلابنا تنبح كلابه
مانحاوج بالمطاريش البعيده

وان ورد له مارد(ن) نشرب شرابه
وان صدرنصدر ونرده مع وريده

وان بغيت الصلح بين لي كتابه
واطف نار الحرب والهجره مهيده

وان بغيت الحرب بذتك الحرابه
الحرايب قدمنا بذت عبيده

شب نار الحرب والبس من ثيابه
واعذرالحكام واعلن في الجريده

الاسود مع الفهود مع الذيابه
والبحور اللي مغارقها سديده

واحتسب للحرب واصبرفي حزابه
والسلاح جداد والفتنه جديده

ساع ما ركب حديده في خشابه
والفشق مو جودوايامك وجيده

وانت من خنذف وحنا من شبابه
ثم كل عز راسه من عضيده

العتيبي من رهاط ليا اللهابه
والمطيري من طويق الى اللبيده

وانت في لابه وانا في جوف لابه
لابة(ن)تذري محاجيها جويده

من وفا يومه وزلت له وجابه
ما نقص منا الحساب ولا يزيده

وانت لك عامين تلعب بالربابه
كيف تلعب بالربابه والقصيده

تحسب إناماعليك إلنا اقلابه
لو صبرناعنك تحتر الحديده

مير حنا في محاكمة النيابه
في ورود الصك حده وتحديده

ثم والله ماتروح بزود جابه
لين ما يبقى لتالينا شريده

تعليقات الزوار

  • كُل المحتوي و التعليقات المنشورة تعبر عن رأي كتّابها ولا تعبر بالضرورة عن رأي موقع الشعر.
  • التعليقات المنشورة غير متابعة من قبل الإدارة. للتواصل معنا اضغط هنا.
© 2021 - موقع الشعر