عدّيت مجدارٍ على كل مجدار - عبدالمعين بن عقل الثعلي

عديت مجدار على كل مجدار
عيطاً بديت براس عالي وعرها

ماواق في عالي حجاه الاّ الاطيار
وإلا السباع القى مداهيل اثرها

إكرام عين تشتهي مد الأنظار
فسحة نظر للعين مدّت نظرها

وإن كان في مد النظر خير وأشرار
ننظر لحال وحال عنه نهجرها

ننظر لدرب الخير نقصر عن الضار
ولاخير في عين نظرها ضررها

واقول من زين التماثيل واختار
واجنى من اطراف المثايل ثمرها

وماقل دل وكل عود له اثمار
تثمر وحلو اثمارها من شجرها

والفرق في طلع النوامي والاشجار
من زين تربتها وحسنى مدرها

حولت منها امشي مع الدرب مرار
مريت منزال البيوت وذكرها

قلبٍ عليهم كن في داخله نار
وعين عليهم مستمرٍ سهرها

سج القدم في منزل البيت واحتار
من صبح لين الشمس طبت بحرها

منزل بيوت عطرها بن وبهار
واشناق حيل من خبرهم خبرها

سلام يامنزل طويلين الاشبار
لو مامكان بيوتها إلا حجرها

منازل اللي تكرم الضيف والجار
مامن يحل بجالها إلا شكرها

خذولهم قيضه ومشتى ومصفار
ومرباع لين العشبة اقفى زهرها

وشافو لهم برقٍ على نجد سمّار
تحت مطاليع النجوم وقمرها

شرقٍ من القبلة مطاليع الانوار
غرب من العارض ضواحي هجرها

يبون مرباع من الوشم ويسار
واقفى ربيع العين واقبل دهرها

معهم عشيرٍ هوجر القلب هوجار
هوجار هوجارٍ بروحي هجرها

روحه على روحي تسابيب واخطار
اسبابه المخطر عقد مؤتمرها

يشير عليه من الخطر حسب الاضرار
شقر القرون ومابدى من نحرها

تاج عليهن العماهيج وشعار
ياشيخة الخفرات واهنه جبرها

اقفى وقفوا به هل المجد والكار
شرب الدغش مر الكبود وكدرها

وانا بدار وليّن العود من دار
لاكنها حجّّه وكتبت عمرٌها

قلت النسب قالوا بدا يدك والحار
أولى بها من ربعها اللي حجرها

يالاد روق اللي لكم صيت واذكار
لاطار عج غبارها من وبرها

وإن جاء لميدان الرمك عج وقتار
كم حولوا بمدرعٍ من ظهرها

تسببوا لي فيه من كل ماصار
اذن عينٍ يفتح الله بصرها

أما بدفع المال وإلا بالابصار
وإلا بصلب أريا الرجال وظفرها

مايقطع الفرجات من طاع الاشوار
ولاطوّع الاصعاب من لاوطرها

وإلا هي الدنيا على الضار والبار
من لا دمر بنيانها ماعمرها

© 2024 - موقع الشعر