الله من قلبٍ تزايد هجوسه
له مدةٍ ماهوب يم الوناسه
يسج وادنى ماطرا له يحوسه
مدري وش اللي بالتفاكير حاسه
غديت انا ويا الهواجيس حوسه
كني على حد الزمن في حراسه
الوضع مزري والحلول معكوسه
والحلم يكبر مالقينا مقاسه
لو تزرع خياره طلع فيه كوسه
ماعاد ينفع جهد والاسياسه
من طاح حظه دوم بقعى تدوسه
تكسيه من رجله ليا حد راسه
الوقت يمضي بس تبقى دروسه
كلن عليه من التجارب دراسه
طبع الليالي والليالي نكوسه
لو اقبلت في تاليتها انعكاسه
ماهي من اللوعات دوم محروسه
ماتنومن للغدر فيها انتكاسه
احدٍ بها يشقى ويجمع فلوسه
يخاف من هم الفقر والفلاسه
واحدٍ يجي تزهاه ناعم لبوسه
مرتاح مايشقى وجوه وناسه
معطيته الدنيا على طول بوسه
ماذاق يومٍ فيه لحظة تعاسه
واحدٍ يجاهد ماسلم من نحوسه
مع قل توفيقه تصيبه نحاسه
يلقى الليالي قدم وجهه عبوسه
تضغط عليه بكل حقد وشراسه
ماعنده الا مايوقي ضروسه
تضغط عليه بكل حقد وشراسه
كن الخناجر في ظهره مغروسه
من قل دخله واصلٍ حد ياسه
الرزق من عند الولي مانقوسه
والخلق تتفاوت بطيب ونجاسه
احدٍ على عرش الكرامه جلوسه
الطيب عوده والشهامه لباسه
واحدٍ خسيس وغارقٍ في نجوسه
تلقى حياته كلبوها خساسه
وفيهم طويل الباع مبعد رموسه
في ساحة الميدان ياقو باسه
واماٍ قصير الباع نفسه يؤسه
مستور حال وعايشٍ وسط ناسه
وفيهم عديم الراي حرمه تروسه
مافيه فود ولاتغرك حساسه
واحدٍ غشيم وكل شين يحوسه
الرزق لامن جاه بالرجل داسه
واللي اكل عرض المقفين سوسه
يسقيك سم الداب في وسط كاسه
تحت الوفا والنصح يخفي دسوسه
نقال هرج وكل شغله بلاسه
هذي وصوفٍ ظاهره ومحسوسه
والفرق واضح مايبي له فراسه

تعليقات الزوار

  • كُل المحتوي و التعليقات المنشورة تعبر عن رأي كتّابها ولا تعبر بالضرورة عن رأي موقع الشعر.
  • بعض صور الشعراء و الشاعرات غير صحيحة، نرجو تبليغنا إن واجهت هذى المشكلة
  • إدارة موقع الشعر لا تتابع التعليقات المنشورة او تقوم بالرد عليها إلى نادراً.
  • لتواصل مع ادارة موقع الشعر إضغط هنا.
© 2019 - موقع الشعر - بواسطة شركة المبرمجين