ياقاري اقر البيوت اللي على اطها
اللي يجي عجزها قافه على آنه
لاتخطي الحرف ثم تقعد تمغطها
وتصير عاله على الشاعر وقيفانه
الحربي اللي بيوته يوم قلطها
من كل معنى لفت بالحيل رويانه
للمفرده فارسٍ بالشعر ضابطها
مابان منها تشوف الجزل باركانه
ابيات شعره بقيفانه يفقطها
للعلم والمعرفه يتعب على حصانه
ابنتحي يمها ملزوم واشفطها
وابطلق القاف معها وارخي عنانه
يكرم عن اللي يجي بالغث حاقطها
كنه ينادي على عيباه بلسانه
اكثر بيوته من الشارع يلقطها
ويصفها جنب مايطلع من اشجانه
الصفحه اللي مضت ماني بعافطها
ممليةٍ من فعول الطيب منصانه
ايامنا اللي مضت كنا نعارطها
واليا صفت كشر الغدار بسنانه
اجواد نوفي لها وانذال نزنطها
مانشري اللي تجي بالسوق هريانه
الشعره اللي براس الكبر نزلطها
ويصير ابوراس كنه ساير اخوانه
الحيه اللي يبيّن لك تراقطها
اشوى من اللي تلون دوم خوانه
اذكر ديارٍ كثيراتٍ مساخطها
عجاجها ثايرٍ والناس ضميانه
لوغير بترابها يكثر ترابطها
تلقى بها ناس صح وناس تعبانه
احباب واصحاب واربوعٍ نرابطها
واغراب وانذال بالاضداد مليانه
ياما سقينا المزارع من مشفاطها
وياما صفى الجو مهما ثار بركانه
ماحسني غير عودٍ قام يزرطها
اشيمطٍ في حياته ضاع برهانه
والديره اللي شلعنا من مهابطها
في صحصحٍ مانبيه لكثر وديانه
يوم امحلت زاد غاويها وساقطها
والحذف ناش المسالم وسط مسكانه
واللي سترته عن الناس وتخبطها
مانته بناسيه قصدك بس حقرانه
اللي بيوته مع الوادي ملابطها
لاجا نهار المواجه يرخي اذانه
والحمد لله طلعنا من مباسطها
ماعاد تلقى لنا في خانها خانه
في كل ديره نجي نرسم خرايطها
نعرف حقوق البلد ونكرم اعيانه
رحله وفا خيرها في تالي اوسطها
والخاتمه لابدت وياك ربحانه
إضافة تعليق - (( user.name )) - خروج
ادارة موقع الشعر (( comment.message.user.name )) (( comment.message.user.name ))
(( comment.message.text ))
لا يوجد تعليقات.