خلاص نفسي بفعلك لاتكدرها
تراي مليت ماني طايق عتابك
الفكره اللي براسي عنك اغيرها
وابرمج الفكر لين تراجع حسابك
الغلطه أللي تجيني منك امررها
مره وثنتين علك تثني ركابك
اعطيك فرصه وحذرا لاتكررها
ماودي اني اعزر فيك وابلابك
الثالثه لوتجي ماقدر اطمرها
اردها وافيه من غير لاشقابك
الارض من تحت رجلينك ادورها
وانزلك لو تعلى فوق مرقابك
ماظن تنسى فعولي وانت خابرها
لكن تجريت بالرفقه ولاثابك
الخوه اللي تضيع بوجه ناكرها
ماتنومن لا غزاك الوقت والوابك
والخوه اللي تبين بوجه شاكرها
احرص عليها وكن الود لاصحابك
ماني عليك انت لاقفيت حاكرها
افلها وان رجعت اقول وش جابك
رفقة هل المصلحه ماكثر مخاسرها
حتى ولوكان راعيها من اقرابك
النفس ماني بدرب الضيق حاشرها
لو كان ماكان ماني طارقٍ بابك
دنياك لازم مع الواقع تسايرها
لو شفت منها عجايب تمسك اعصابك
امقرد الخلق تبغى من يقاشرها
تبلش بها كل يوم تشيل مشعابك
العمر كله سويعاتٍ نقزرها
لابد يومٍ يجي وتودع احبابك
سكة حياتي على ماجات عابرها
مكتوبلي ماكتب وانته لك كتابك

تعليقات الزوار

  • كُل المحتوي و التعليقات المنشورة تعبر عن رأي كتّابها ولا تعبر بالضرورة عن رأي موقع الشعر.
  • بعض صور الشعراء و الشاعرات غير صحيحة، نرجو تبليغنا إن واجهت هذى المشكلة
  • إدارة موقع الشعر لا تتابع التعليقات المنشورة او تقوم بالرد عليها إلى نادراً.
  • لتواصل مع ادارة موقع الشعر إضغط هنا.
© 2019 - موقع الشعر - بواسطة شركة المبرمجين