كلمة معلم على سبووورته

اشهد ان الوقت من مبطي يدور
بس انا توي دريت بدورته

اطرد الدنيا وتاليها دبور
كنني عودٍ على باكورته

توني للحين في عمر الزهور
مادفعت من الزمن فاتورته

جيت في عز الحضاره والظهور
طحت في وقتٍ تفجر ثورته

عالمٍ تاكل عشاك مع الفطور
وكل واحد في فمه شابورته

الآوادم فالبيوت وفالقصور
ماحدٍ يرتاح في مقصورته

الكلام الصدق مايغشاه زور
لو قرأ الكذاب في منشورته

الحقيقه ثابته والعلم نور
كلمة معلم على سبورته

من قديم الوقت من ذيك العصور
يوم دوب الرجل يستر عورته

مايشل الحمل ياكود الصبور
من جزع تستقبله مثبورته

مادريت ان الزمن جريه حدور
لين شفت اشلون غير صورته

قدم عيني شفت بركانه يفور
والليالي تنقلب مع فورته

لو بدا هادي يجي وقت ويثور
ماتطفي ثورته نافورته

الحياه دروس والدنيا عبور
سنة الخلاق في معمورته