خل الخدود وخل عنك الشفايف - عبدالله مرزوق المرشدي

رمش العيون السود هو سبة الجرح
خل الخدود وخل عنك الشفايف

بعطيك موجز مع قليلٍ من الشرح
ان كان منت من ادعج العين خايف

لاسلهمت تشوف من حولها طرح
برماحها اللي مثل حد الرهايف

فيها الحزن والضيق والسعد والفرح
فيها من الاضداد تلقى ولايف

السحر والموت الحمر بانيٍ صرح
بين الرموش السود بابه مسايف

ماحولها حد النظر منبرح برح
واللي يقف ماطاح يبقى مهايف

باسبابها قلب العنا صايبه قرح
ماتضرب الا بالضلوع النحايف

سبحان من صور بها الفرح والترح
واضفى عليها من بديع الوصايف

بحسابها ماينفع الجمع والطرح
ولاتقبل القسمه وتاخذ نصايف

ياليت يكتب في جبين الضبا شرح
تنبيه بالاخطار قبل الكلايف

يكتب على ماقالوا اهل الهوى جرح
يعني عذاب وحسن طاغي وكايف

© 2023 - موقع الشعر