يا اللي اتغلى خل عنك التغلي - عبدالله مبارك الردعان

البارحه سهران ودمعي يهلي
على حبيب(ن) خان عهد المحبين

محدن يلوم العين فيما حصلي
اسهر وعندي استوى الليل ليلين

يامل قلب(ن) راح عنه المسلي
ماله رفيق ولا لقاله مسلين

هذي ثلاث شهور من راح خلي
وانا انتظر لاماه حين(ن) بعد حين

من قبل لاجيته يفز ويهلي
واليوم كنه ناسي(ن)عدت اسنين

يااللي اتغلى خل عنك التغلي
الكبر لله يا عنود المزايين

اجر ونات(ن) ولاحدن فطنلي
لاهو داريبي ولا الناس دارين

ليا ذكرت ايامنا اللي مضلي
هلت دموعي وقلت لالا تهلين

قالوا لي العذال خله يولي
تلقى بدال الزين عند العرب زين

الله جعل حب الشقا مهنتلي
وشلون ابدور بدال اريش العين

لكن يومنك نويت التخلي
ماني بملزوم(ن) بطرد المقفين

تعليقات الزوار

  • كُل المحتوي و التعليقات المنشورة تعبر عن رأي كتّابها ولا تعبر بالضرورة عن رأي موقع الشعر.
  • التعليقات المنشورة غير متابعة من قبل الإدارة. للتواصل معنا اضغط هنا.
© 2021 - موقع الشعر