إقرى وصاتي - عادل العوادي

أوقدت نار وصبّ حزني فناجيل
وغنمت شعري للظروف بسكاتي

شوفي السهر وقضّ من الهم قنديل
يعني غيابك جمر يحرق لهاتي

قطّفت نجمة شوق/هي نجمة سهيل
وخليت وجه الليل يلمس شفاتي

كل عام جرحي عيد ويصحّي الليل
بس الغريبة العيد يرمي حصاتي

الليل والبيدا والسيف والخيل
كلها تخاف وترتجف من صفاتي

عسيت ملح الدمع بللت منديل
وكيت فوق الضيم /طاحت عصاتي

من يشبهك يا الخوف دمعي غدا سيل
خليت شوك الأرض يجرح نباتي

المشكلة ماهي من معانق الويل
المشكلة ويلي يصاحب حياتي

تدري جذوري أرض/وشموخي نخيل
بس الدهر روّض بقايا أمنياتي

خلني أوقّد نار/ما عاد لي حيل
دام البرد يقرص / شدّي عباتي

أوقدت نار وصبّ حزني فناجيل
وغنمت شعري للظروف بسكاتي

© 2024 - موقع الشعر