اه ثـم(ن) اه مـن هـم(ن) دفيـن - طامي الرياحي

1 اه ثم(ن) اه من هم(ن) دفين
مستكن(ن) وسط قلبي من سنين

2 اكتمه واخفيه عن هذا وذاك
مير مايخفى لبد انه يبين

3 هاض بالي بعد ما اوحيت الحمام
ايتلاحى فوق غصن الياسمين

4 ياحمام الورق يوم انك تنوح
هو طرب ولا كرب ولا حنين

5 كان طربان(ن) فلاني لك صديق
وكان حز نان(ن) فانا مثلك حزين

6 ارخ صوتك لاجزاك الله خير
من سمع صوتك يبيح ابه الكنين

7 بالاخص ان كان مثلي ماينام
كل مانامت عيون العالمين

8 اتقلب كل ليل(ن) في الفراش
نايم(ن) ساعه وصاحي ساعتين

9 ماسهرت بحب مركوز النهود
مثل ماتسهر عيون العاشقين

10 مير ابي حزن(ن) قديم(ن) من زمان
ويتجدد بين حين وبين حين

11 كل ماقلت انتهى عني وراح
شفت صورة صاحب العقل الرزين

12 صورتك يابوي عني ماتغيب
ماقدرت انساك ياذرب اليمين

13 كيف لي بانساك وانت اللي عديم
ماخلق مثلك بصفتك اجمعين

14 مابقول الناس مافيهم رجال
في البعيد وفي الربوع الاقربين

15 به رجال(ن) شانهم شان(ن) عظيم
مير شبرك فوق شبر الشابرين

16 بالكرم حاتم زمانك يالاصيل
وبالشجاعه ماتخاف المعتدين

17 فارس الهيجاء وليث(ن) من ليوث
صامل(ن) تربك قلوب الصاملين

18 في نهار(ن) شمسه بعجه تغيب
والرصاص الحي جاين له دنين

19 والنشاماء ذا قتيل وذا جريح
يذرف العبرات ويجر الونين

20 كم فرج كربه وكم لاقى جموع
كن موت اعداه لسلاحه قرين

21 فيه فزعه فيه جزعه فيه باس
فيه حلم وفيه علم وفيه دين

22 وان تكلم يوم وافصح بالبيان
والرجال اهل المعرفه حاضرين

23 يسكتون ويسمعون لما يقول
حيث هرجه كنه الدر الثمين

24 ويكرم الضيفان ويصون العهود
وينصر المظلوم ويجيله عوين

25 والخوي والجار لو الوقت جار
كل منهم كانه لروحه وزين

26 ويتواضع للكبير وللصغير
والامانه فوقها حرص(ن) امين

27 وانت ياللي ماتعرف ابن غفلان
روح وانشد منهم اله معاصرين

28 مات لكن ذكر مجده مايموت
عايش(ن) ذكره مع اللي عايشين

29 عاش في وقته بعز(ن) وافتخار
ولحق ربع(ن) قبل موته ميتين

30 الرجال اللي يضدون الحريب
الكريمين العزاز الطيبين

31 كل ماسيرت وسط ديارهم
الذي فيها من اول ساكنين

32 ثم شاهدت المرابع والرسوم
استهل الدمع فوق الوجنتين

33 والزرايب يوم اجيها والرجوم
كانها تقول وين الناس وين

34 شكلها موحش ولا فيها ونيس
بعد ماكانت مقر الغانمين

35 قلت الا يادار وين اللي زمان
عن حدودك يبعدون الطامعين

36 وين ابوي ووين فيصل مع حمود
وين ابن حريص وينه مع حسين

37 وين محمل وين قضعان وعتيق
وباني الحزقاء كعام العايلين

38 وغيرهم واجد شجيعين(ن) كرام
كانوا من اول عليك محافظين

39 كم حموا حدك بطعنات الرماح
والسيوف الصارمه والمارتين

40 وادخلوا فيك الدخيل وقدروه
وانصروا في ربعك المستنصرين

41 يازرايب ديرة المجد التليد
ياحصون الاسد وليوث العرين

42 كم بدابك من سبور ومن قنوص
تشهدين بطيبهم لو تنطقين

43 عزوة(ن) ماباعوا الشيمه ولا
طاوعوا لأنفوسهم فيما يشين

44 بالوفاء والطيب في كل الامور
ايتواصون ويوصون البنين

45 انتهوا وامجادهم ماتنتهي
دائم(ن) لامجادهم متذكرين

46 آه الا ياليتني معهم نشيت
وانتهيت بوقت هم به منتهين

47 اشهد انه ماعلى الدنياء قرار
زايله واللي عليها زايلين

48 لو عطتك اليوم بكره يالفهيم
تسترد اللي عطتك ولك تهين

49 لاتغرك لو تراها لك ضحوك
تضحكك مره وتبكي مرتين

50 الحضيض اللي ينال ابها جميل
ويدرك الامجاد رغم الحاسدين

51 يخلص اعماله لعلام الغيوب
ولا يطيع اوامر ابليس اللعين

52 يوفي حقوق الله ويطلب رضاه
وبعدها يوفي حقوق الوالدين

53 ويوفي حقوق الرجال بكل حال
مايكل ولا يمل ولا يلين

54 ويبدي الترحيب لاجوه الضيوف
ماعبس لاشافهم له مقبلين

55 وان تنصوه الرجال بمشكله
حل مشكلهم وراحوا قانعين

56 وان تحداه الضعيف ابن الضعيف
عز نفسه مايناظر له بعين

57 وان تحداه الشجيع ابن الشجيع
يقف ميقاف(ن) يشوق الناضرين

58 كان يارجال تجهل بالرجال
عنهم اعلمك بالعلم اليقين

59 فالرجال ارجال مافيهم قصور
كاملين(ن) بالرجوله كاملين

60 وفالرجال ارجال شيفتهم رجال
والحقيقه يوم افكر ناقصين

61 فيه رجل اذا تقابلت الوجيه
يندرق ويروغ مثل ابا الحصين

62 وفيه رجل اذا تقبلت الوجيه
اخذ حقه يوم مدات اليدين

63 وفيه رجل ان جاه ضيفه من بعيد
يلتوي وجهه ومنطوقه يشين

64 وفيه رجل ان جاه ضيفه قلطه
فوق هيل وبن مع كبش(ن) سمين

65 وفيه رجال(ن) تصرفه المره
تامره ويقول هذا الراي زين

66 وفيه رجال(ن) يصرف له رجال
ولا يشير الا الرجال الفاهمين

67 وفيه رجل(ن) دايم(ن) قلبه بليد
و فيه رجل(ن) دايم(ن) قلبه ذهين

68 وفيه رجال(ن) اذا سولف كذوب
مايحسب حساب نقد الناقدين

69 وفيه رجال(ن) اذا سولف صدوق
مايعرف الكذب مثل الكاذبين

70 وفيه رجال(ن) على النمه حريص
دايم(ن)قتات بين المؤمنيين

71 ينقل الاخبار من هذا لذاك
في قفا من غاب دائم له رطين

72 يفرح ان شاف العرب متزاعلين
ويزعل ان شاف العرب متسامحين

73 وفيه رجال(ن) لخلق الله حسود
والحسد طبع الضعوف العاجزين

74 وفيه رجل(ن) للامانه مايخون
وفيه ناس(ن) للامانه خاينين

75 وفيه رجل(ن)دايم(ن)سده ضعيف
ينكشف سده لا سولف كلمتين

76 وفيه رجال(ن) سدوده ماتباح
كن سده وسط صندوق(ن)ضمين

77 وفيه رجال ايتكبر والصحيح
مايشيل الكبر غير الاصغرين

78 ذا بعض ماشفت من وصف الرجال
والزمان ايصحي اللي نايمين

79 والليالي مثل ماقالوا تدور
وبفعايلها تروع الغافلين

80 والبنادم لو عدا ليل ونهار
ماله الا ماكتب له فالجبين

81 مير كثر النوم من طبع الرخوم
الذي للمسكنه مستسلمين

82 انت حاول قدر منت بتستطيع
واطلب الله يمكن الله لك يعين

83 كل من يجهد وله حظ ونصيب
مايخيب ربي اللي مجهدين

84 ان كسبت الخير فشكر من عطاك
الله يديم النعم للشاكرين

85 وان غدا لك شي لاتجزع عليه
التجزع من طبوع الكافرين

86 الزمان اليوم جا فيه اختلاف
والعرب مثل الزمن متغيرين

87 كانوا من اول يقيسون الرجال
بالرجوله لو فقارى معدمين

88 وصاروا اليومه يقيسون الرجال
بالمناصب والدراهم يافطين

89 كان لك منصب وبه عندك فلوس
فانت غالي وانت طيب وانت زين

90 وكان لامنصب ولابه معك مال
صرت شين وكل شي(ن) فيك شين

91 والخليفه علي قدامي يقول
قول فاللي بالصداقه مدعين

92 قال مكثرهم بحزات الرخاء
مير في وقت اللزوم قليلين

93 اشهد انه صاق(ن) فيما يقول
انشد انشد فالرجال مجربين

94 حد لك منصب ولك مال(ن) كثير
ماكثر اللي للصداقة طالبين

95 وان غدا المنصب ومالك عنك راح
شفتهم لك جاحدين ومنكرين

96 الصديق اللي اذا احتجته يروغ
وان بغاك يحط روحه لك ظنين

97 خله يولي لعله مايعود
غيبته راحه وقربه علتين

98 الصداقه طيبه بين الرجال
مير راحت مع زمان الاولين

99 وين احصل لي صديق(ن)مايبور
والعرب عن بعضهم متفككين

100 والجماعه بعد ماكانوا جميع
اصبحوا في ذا الزمن متفرقين

101 كل واحد في زمانه له طريق
ولا يلد بعين صوب الاخرين

102 لايغرك لو تحصلهم جميع
القلوب اشتات لو متجمعين

103 والاخو ياخذ سنه ماشاف اخوه
وان تلاقوا كنهم متزاعلين

104 كل منهم يخفي اسراره وراه
كنهم دوب انهم متعارفين

105 وان تهاوشوا البزوره والحريم
اصبحوا من بينهم متهاوشين

106 جعل منهو مايكمل حق اخوه
ويستمع في الوشاه المغرضين

107 ولا يحطه دايم لروحه عديل
ولا يباله رفعه ونصر(ن) مبين

108 ياعسى عمره مع الدنيا قصير
وانت ياسامع كلامي قول آمين

109 يارفيقي كان ماتقدر تكون
فالقسى واللين لي حصن(ن) حصين

110 مانبى لك رفق ياولد الحلال
عن مرافقك الصناعي مغتنين

111 كان ماتوفي حقوقي في الحياة
منت قاضي لي بعد ما موت دين

112 يا اله الكون يارب العباد
ياكريم وياعظيم ويا معين

113 لا تحملنا بما لا نستطيع
ودلنا درب الهداه المهتدين

114 وعز دولتنا بحكم ال السعود
الملوك العادلين الصالحين

115 وافضل التسليم مني والصلاة
عد ماصام رمضان الصايمين

116 للرسول اللي بعثه الله رسول
خاتم(ن) للانبياء والمرسلين

طامي الرياحي
© 2024 - موقع الشعر