من هجوس صادقه تجتول جوف الضمير
ودي امدح لابتي والمثايل ودها

الخنافر هم هل الفعل والمجد الكبير
تنعرف وقفاتهم والعباد تعدها

عزوةٍ ماهيب ترحل ليا جاها النذير
ما تزحزح روس قوم عريبٍ جدها

لابةٍ لا صار يومٍ عبوسٍ قمطرير
بالسيوف الحدب تصطي وتروي حدها

فوق قبٍ عجها بالضحى كنه غثير
ويل منهو في نهار الملاقا ضدها

ما تحسّب للمعادي ولو جمعه كثير
تنتصر بالكون لو هو قليلٍ عدها

قبل ترسيم الخرايط وتقرير المصير
كل دار بوشهم قد رعى في خدها

ابلهم ماهيب توخذ يصير اللي يصير
لو تبوج الارض من حدها لا حدها

وسمها له هيبةٍ كل ما شافه امغير
قال هذا وسم قومٍ ما حنا قدها

ابعدو ياهل السبايا عن الشر الشرير
وش نبي بابل الخنافر وهي بتردها

عزوةٍ من روس قحطان مزبان الجوير
الله اللي بالدها والشجاعه مدها

كم وقع من فعلهم من قتيل ومن كسير
يوم بقعا يصطفق جزرها مع مدها


تعليقات الزوار

  • كُل المحتوي و التعليقات المنشورة تعبر عن رأي كتّابها ولا تعبر بالضرورة عن رأي موقع الشعر.
  • بعض صور الشعراء و الشاعرات غير صحيحة، نرجو تبليغنا إن واجهت هذى المشكلة
  • إدارة موقع الشعر لا تتابع التعليقات المنشورة او تقوم بالرد عليها إلى نادراً.
  • لتواصل مع ادارة موقع الشعر إضغط هنا.
© 2020 - موقع الشعر