عقلي يكلي مات… اسكت وخلص
وگلبي يولول لااا… يرجع
مو صوت… هذا عويل بروحي
صوتين بيهن اتذابح
واحد يحفر گبرك بعيني
واحد يلمك بضلوعي ويذبح
ذاك يكلي سلم للحقيقة
وهذا يكلي بدونه أذنبح
مات؟ لااااااا! ما أصدق
راااح؟ لااااااا! ما أودع
انتهى؟ لااااااا! كذب كله
حسن حي… بصدري يصرخ
أگرب للگبر… وتنكسر رجلي
مو خوف… هذا وجع يقهر
أمد إيدي… ترتجف جفوفي
أحس الأرض فوقي تنحفر
أصيح حسن… ردلي صوتك
حتى لو همس… حتى لو أثر
بس الصمت يضحك بوجهي
ويگلي بعدك للحلم أسير…
أگعد بليل ما بيه نجوم
وأحچي اسمك لين أنخنگ
أحضن صورتك مثل طفل
مضيع أمه… وبالحضن يحترگ
أشمك بيها… أبچي عليها
وأحس الروح من صدري تنسرگ
وأگول اليوم يمكن تجي
وأموت ألف مره من الفراگ
عگلي يكلي خله وراح
وگلبي يكلي بعده هنا
عگلي يكلي سد هالباب
وگلبي يكلي افتحه إله
صرت أنام وأگعد اسولف بيك
حتى الحلم ما يفلت منك
أركض إلك… أبوس إيدك
وأصحى بدمعي… مو حضنك
ليش الفقد هيچ يسوي؟
ليش الحي يعيش بغيابك؟
ليش أنفاسي تمشي باسمي
وروحي كلها مربوطة باسمك؟
أكتب رسايل وما تنقري
وأحچي وياك وماكو رد
وأحس كل الدنيا گبور
وأنا بعدك بعدني أنعد
ميت حي… ومشدود إلك
لا أرتاح… ولا أنفك گيد
إذا متت… ليش كلشي بيك؟
وإذا حي… ليش ما ترجع؟
تره روحي بين الكلمتين
تنذبح… تنذبح… تنذبح
وأنه أگول بصوت مكسور
حسن… لو تموت روحي گبلك
يمكن ذاك اليوم… أقتنع… 💔
الف رحمه ونور على روحك ابو فلوح
يشهد الله تعبت والله تعبت
إضافة تعليق - (( user.name )) - خروج
ادارة موقع الشعر (( comment.message.user.name )) (( comment.message.user.name ))
(( comment.message.text ))
لا يوجد تعليقات.