خيل خيال وقام يبرق مخيله
وطاحت هماليله كما جمر بركان
وفاضت به الوديان من كبر سيله
وشق الهضاب وكل شعب(ن)وريضان
حنا البقوم اهل العلوم الجزيله
حنا دوا العايل لياثار دخان
اليا بدينا مانكب الطويله
والياانتخينا موت من جاك نشطان
حنا هل الطالات زبن الدخيله
حنا ذراها يوم زوغات الاذهان
حنا هل المعروف واهل الجميله
يشهد لنا التاريخ في كل الازمان
حنا عذاب اهل القلوب الغليله
في زود عز وللعدا دوم نقصان
الكثر ما عزالنفوس الذليله؟!
والقل ماذلل هل العز والشان!!
اقبل سمين القول ماقبل هزيله
والذيب ماعمره تخاوى مع الضان
في كفة الميزان يرجح ثقيله
فينا الشجاعه رجحة كل ميزان
حنا ذبحنا الترك بأم الفتيله
حنا حمينا الدار من كل طمعان
من طاح منهم مالقى من يشيله
وادى( السليم) من الجثث صار( ريحان)
ماجوا لنا باالطايرات المهيله
ولاجوا لنا باسقاط جوأ بحزمان
جونا يجرون الحمول الثقيله
في وسط شعبانٍ ومن بين وديان؟!
مر(ن)نهار ومر في وسط ليله؟!
ماكنهم مروا مع الدرب عربان؟!
واللي تجنبهم مشى في سبيله
مايعترضهم كود طلقين الايمان
والفعل ثابت عندنا مانحيله
تشهد به العقال في كل الاوطان
فعلٍ صحيح وثابت(ن)به دليله
ماهي سناوي رمي من غير نيشان
واليوم كل(ن)قام يظهر حصيله؟!
ويعدل التاريخ زور(ن)وبهتان؟!
يامعدل التاريخ ودك تزيله
حتى تحط لقصتك فيه برهان؟!
مايستوي من ركب فوق الاصيله
والروح سبلها بملبوس الاكفان
ولا من يشيل معكفات(ن)صقيله
مع من قعد في خدر ضافية الاردان
من طاح عند انحورهن عزتي له
من ريح دمه حام جارح وسرحان
ويامنجي من الموت زهرة خليله
ياالواحد المعبود خلاق الاكوان
تغفر لنا ياواحد(ن)نلتجي له
لا اقفت ركايبنا ووقت اللقا حان

تعليقات الزوار

  • كُل المحتوي و التعليقات المنشورة تعبر عن رأي كتّابها ولا تعبر بالضرورة عن رأي موقع الشعر.
  • بعض صور الشعراء و الشاعرات غير صحيحة، نرجو تبليغنا إن واجهت هذى المشكلة
  • إدارة موقع الشعر لا تتابع التعليقات المنشورة او تقوم بالرد عليها إلى نادراً.
  • لتواصل مع ادارة موقع الشعر إضغط هنا.
© 2020 - موقع الشعر