بنيت قافي بني بيتٍ علـى سـاس - صقر الصقر

بنيت قافي بني بيتٍ على ساس
ولاينبني بيتٍ على غير سيسان

وشربت فنجالٍ جلى كل عوماس
يشرح ضمير اللي مع الهم عمسان

في بيت عزٍ بيت 00نخوه ونوماس
بيت الشيوخ اللي سلايل كحيلان

يشهد لهم تاريخهم وانشد الناس
ماجت لهم باالمدح طلقين الايمان

من نسل (عاضه)يوم قبات الافراس
زبن الضعيف معشي الذيب سرحان

كم فارسٍ قدمه على الخيل باالطاس
راحة حياته يوم زوغات الاذهان

من فعل ابن شلهوب يعطن الارماس
مواكر احرارٍ على نسل حوران

من لابةٍ يوم اللقا باسهم باس
ذيابة حضن لاثار ملحٍ ودخان

قلته وانا من لابةٍ ترفع الراس
سمو القروف اللي لها الحرب ميدان

تاريخهم ماهوب حبرٍ بقرطاس
تشهد به مطير وعتابه وقحطان

اهل الحميا يوم دقات الاجراس
تشهد سبيع وشاهدٍ يوم حوقان

يوم ان عمشا نطلت غال الالباس
وتنخى على البعاج فارس وديقان

وتهدي بحبتها على كل مرواس
ولاحدٍ من اللي جال باالخيل فتان

والطيب مايغرس على كف غراس
موارثٍ جتنا على ورث جدان

وصلاة ربي عد ماهب نسناس
واعداد مايبحر على البحر قبطان

واعداد ماغاص البحر كل غطاس
على نبيٍ بعث للانس والجان

© 2024 - موقع الشعر