حمام ياللي سجع والحزن بلحونـه - صقر الصقر

حمام ياللي سجع والحزن بلحونه
على غصون(ن) عذيات(ن)مواريقي

هيضت قلبي بعد ماغاب مضنونه
وسالت دموع العيون اللي مشافيقي

اتلى العهد به يصك الباب من دونه
بيبان بيته بعد مااقفى مغاليقي

وقعدت اناظر جدار البيت وركونه
واذكر زمان المحبه والتعاليقي

الصاحب اللي لك الله صرت مفتونه
كان السبب في تعاذيبي وتعليقي

اقفى ونفسي معه بالحيل مجنونه
ابو عيون(ن)بها ذبح العشاشيقي

ربي عطاها جمال(ن)زاهي(ن) لونه
ماهو جمال(ن) صناعي بالمساحيقي

يازين مشيه ليا جاني على هونه
من حشمته دايم(ن)مشيه ترافيقي

ياحلو كلمة هلا مع نظرة عيونه
لو شفتها ياصقر عفت المخاليقي

قلبي بعدها كفخ من سبة طعونه
جرحه صطا ياصقر بين المعاليقي

يكفخ عليها سواة اللي يشيلونه
حر(ن)تتله على الوكر المسابيقي

ياعزوتي يارفيق القلب ياعونه
اشكي عليك العذاب من التفاريقي

النفس معها على ماصار مرهونه
انا اشهد اني عليها ناشف(ن)ريقي

© 2024 - موقع الشعر