نجم اشوفه يمنا يسند جديد القافي

هذه القصيده ردا على الشاعر / نجم
مرحبا بك عد من صلى ومن يطافي

وعد مايصرف ريال النقد من صرافه
نجم اشوفه يمنا يسند جديد القافي

يحتسي لي كل علم(ن)يبدعه في قافه
احسبنه يعسف المهره كما العسافي

لين بان العلم للعرّيف والعسافه
راسم(ن)له صورة(ن)فى الصدر ماتنشافي

فوق عرش الحب جالس ملتحف بلحافه
واثره اللي فى الظلام يدور الكشافي

ضيع دروبه بعد ماضاع به كشافه
اثر بعض الهرج دوم يجيك فيه ارجافي

مايجي مع دربه اللي عارف(ن)محرافه
من يلوم اهل الهوى بدروبهم متحافي

لازم انه كل رجم(ن)راقي(ن)مشرافه
الغزال اللي وصفته كامل الاوصافي

مايوصف به ياكود الشام والا اكنافه
كان قلبك منخطف بندور الخطافي

والزمن يانجم مااحد(ن)سالم من اصدافه
والذهب لوطال وقته واغتشاه السافي

مايغير لمعته والا تزيل اوصافه
من ركب موج البحر ماسرّه المجدافي

يغرقه موج البحر ماينفعه مجدافه
وأنت حر(ن)ماقعه في عالي المشرافي

في علاوي هضبة(ن)ماجالها مردافه
لاتنبه عين من هو في منامه غافي

ولا تزود جيوش عذال(ن)تزيد احلافه
كان حبه في ضميرك عالق(ن)ياالوافي

عش على ذكراه تكفي لمحته واطيافه
وسج في دار الربيع وديرة المصيافي

ولاتطارد كل مقفي وانشد العرافه
وأرد فوق العد كان العد جمه صافي

وغوص وسط البحر تلقى جوهره واصدافه
وهذه قصيدة الاخ نجم التي قمت باالرد عليها

آه من جرح(ن)جديد(ن) في فوادي خافي
جدد الجرح القديم بدمعة(ن) ذرافه

ليتني ماشفت عينه يوم لد خلافي
شفت سهم الموت في بسمة فمه وشفافه

التحظني بالعيون السود الا ياكافي
مادرى اني واقف(ن)وسط المحل خلافه

يوم لدت لي نظرها صابني خفخافي
احسب انه صاحبي واثره عليه اوصافه

ماتحرك من مكانه واقف(ن)ميقافي
قلت يبن الناس بالله رحمتك والرافه

العهد فيه يتبسم والثمان رهافي
وحارت الاقدام ساعه واقف(ن)ميقافه

عينها عين اشقر(ن)صكوا عليه حيافي
فالشبك مطروح والبرقع مع الحوافه

والله اني قبل اشوفه داله ومتعافي
ناسين درب الهوى مالي عليه احسافه

ولعت نيران قلبي ماطفاها طافي
مثل توليع الهشيم بقدحة(ن)فالسافه

ذكرتني صاحبي قبل الزمان الجافي
ابتعد عني وليفي يوم حان اقطافه

ذكر القلب المعنى صاحب(ن)ميلافي
شفت عينه في عيونه والردوف اردافه

كان يسكن في عيوني والرموش لحافي
واهني اللي بعينه بانظر ماشافه

لقبلت يمي تكسر بالدلع غريافي
لامشا كنه يليم ياصقر طرافه

بنت ابوها من رجال(ن)يكرمون اللافي
اخذ(ن)طيبه وعزه من حياة اسلافه

ماتركني صاحبي ذبح القلوب عيافي
اشهد انه ماتركني من هواه اعيافه

ليت ابن خشرم نظرها يوم قالت كافي
كان لليومه اندور فالبلاد اسعافه