محسن - ابراهيم فراج الزعبي

الحزن سيل جار وفايضن وديانه
والصبر عود ضايق به سماه وبرّه

كيف يلقى النسم من هو تثور أشجانه
دام من يطلبه  ماباقين  له جرّه

كود بيضاء مثبتن على سيسانه
علمٍ إن جابوا اسمه قيل لله دره

ماقفٍ مايشابه له مايملى خانه
وكلمتن لا تزهّل ماتجي مفتره

ومنكبٍ لو يزود الحمل زاد إتقانه
شامخٍ كنّ متنه من جبال الحرّه

باذلٍ جاهه وماله على ضيفانه
ورغم قدره ولكن به تواضع مره

كم نفوسٍ تهالك جات له بلشانه
ورّدت عدوده وراحت وهي مستره

كم تعنّا رضى للعالم الغلطانه
ومن يقّصر معاه يواصله ويبرّه

أستمع في نداء مجلاسه وديوانه
يطلبونه ويرجونه يعيد الكره

لا غرابه ف محسن نادرين أعوانه
في زمانٍ تراجع خيره أقبل شرّه

كل مازادت ألآمه يزيد إيمانه
علّم اليائسين أن القناعه درّة

فقدته كايدة للي يبيه أوزانه
لأنه الوافي اللي كم ستر من غرّه

العزاء ما أختصر في ربعه ول أخوانه
العزاء للمراجل والنفوس الحرّه

رحمة الله عليه وعفوه وغفرانه
جعل وجه البشوش الجنة المخضرّه

إبراهيم الزعبي
© 2024 - موقع الشعر