شاهد على قو العزيمة نضالي - عماد محمد الرشيدي

يالله برزقن منك ياذا الجلالي
يعيد للنفس التعيسه سعدها

انت الكريم الي عليه اتكالي
لو تضرب العربان زايد عددها

اشكي لك من القل يارب حالي
وانت العليم بكل نفس وجلدها

تخيب  هقوتنا  بعمن وخالي
والناس خايب من نخاها ونشدها

ولا هو بعيب القل ان كان مالي
ما دام نفسي باقيه في رشدها

راسي عن الامجاد ماهوب سالي
ولا فيه مورد عزه الا وردها

شاهد على قو العزيمة نضالي
ونفسٍ تقاوم لو يخلص جهدها

ولو تنزل همومي بروس الجبالي
تنهد ما تقدر تحمل نكدها

صابر ولو ما عاد فيها مجالي
دام اقترن عسر الحياة برغدها

ويارب انت العون وانت الظلالي
طالبك عيني لا يطول سهدها

© 2024 - موقع الشعر