بقول لك شي

ماني بجياع منك ولاني برويان
صدك مثل زرع النخل بالسفينه
لو كان قربك فود مارحت طربان
اذبح على فرقاك معزه سمينه
 
وان كنت تحسبني بفرقاك زعلان
والا بحسره وعايشن في غبينه
طالع وعاين فرحتي كان بمكان
باخذ على فرقاك وحده رزينه
 
وبحوف دار المملكه ونشد الحان
شفني مسافر نجد لين المدينه
باخذ بعد فرقاك مسكن وريحان
طاريك شين وريحتك زود شينه
 
ماضيع العاقل ثمانين وجعان
ولايتبع الخبلان قومن فطينه
ولايعجب الساكت سواليف حنان
يصيح من اذنيه ويشكي طنينه
 
بقول لك شي بعد فات الاوان
عندي كلام وحكمتي لك ثمينه
لاتامن الجايع ولاتصد جوعان
ولاتاخذ اللقمه وهي في يدينه
 
من ينكر العشره ليا كان ماكان
اقطعه لاتامنه واقطع وتينه
واقرب من اللي بالمواقيف رويان
مثل الاسد في ماقفه في عرينه
 
ماني بضايع فيك ولاني ببلشان
ولاني بهينك وانت قربك مهينه
وقتي ثمين وحاجتي مالها اثمان
وانت اللي مثلك مانصافح يمينه