عزاه ياقلبً من الهم منصاب

عزاه ياقلبً من الهم منصاب
همً تمكن بالضلوع المحاديب

همً معه ذقت المصايب والاتعاب
من يوم فارقني كحيل المهاديب

اللي معاه القلب مطواع ياعقاب
غروً خذى قلبي ولايعرف يجيب

المبسم الاحمر تضيع به الاسباب
والصدر مزبورً وريحه كما الطيب

غروً حكاني من ورى درفه الباب
ياشيب عيني من حكاياه ياشيب

قال اشتبي بالله يا ولد الاشناب
مانيب من تلحق اهلها عذاريب

قلت الحكي وياك ما هوب ينعاب
والله يعلم في السراير وفي الغيب

قلت الهوى يا بنت الاجواد غلاّب
يبين في عيوني و لا فيه تكذيب

قالت غرامك واضحً بين الاصحاب
ما فيه لا شكه ولا يلحقه ريب

بس الصراحه مابها كذب و انهاب
اخاف لا يعوي على حبنا ذيب

قلت المحبه عاليه فوق مرقاب
ماهي محبه عيب بين الرعابيب

قالت كلامك طب ياسيد الاطباب
قلت الهوى انتي ولا منه تجنيب

اخذت رساله دمعتي بين الاهداب
مكتوب فيها من جزيل المكاتيب

قلت افتحي هالباب يا ترف الاحباب
قالت اخاف و قلت ما به معازيب

قالت دقايق بلبس لباس وحجاب
لا ابد اغطي لا تجيني عواقيب

قلت الغبي من هو يشوفك ولاذاب
هذا جمالك يستحق التراحيب

قالت تعال ولنت من ضمن الاجناب
خلنا نسولف ياابيض الوجه في السيب

قلت ابشري والعقل توه ولا غاب
باقي عليه شوي يا بنت ويغيب

حرام لو تلبس على الجسم جلباب
يا ويل حالي يوم شفت الجلابيب

قالت تعال اجلس ترى الدمع سكاب
من عيني اللي في طرفها لواهيب

قلت السبب قالت وهي حظها خاب
لي ابن عمً شفت منه الأعاجيب

قالو نخطبه لك من بين الاقراب
امي وابويه منّهم بفري الجيب

قلت النصيب يصيب والحظ لعاب
لو كان ما نبغى تدور الدواليب

قالت زواجي بعد عامً وانا شاب
راسي من الخطبه وكثر الخطاطيب

قالت كذا والدمع بالخد صباب
حوّل على خدي وانا منه بغيب

قالت كلامي صدق ماهوب كذاب
لا قلت قولي ما عرفت الاكاذيب

قلت البلا يا بنت يا بنت الاعراب
اني معاد اشوف زولك ولا اطيب

قالت خلاص اطلع ترى الوقت جلاب
يمكن يجون اهلي بعد طول تغريب

قلت ابشري والحب ياتلع الارقاب
باقي وتلقينه بروس المراقيب

قلت الكحل والوجه يابنت جذاب
وشعاد يجذبني ليا زاد تجذيب

قالت تغزل بالقصايد و الالقاب
الا الصدر والردف والخصر والعيب

قلت انتي اللي فيك ملحً وترحاب
وفيك الوفا والعز والجود والطيب

بنت الرجال وبنت طيبين الانساب
خاضت بهالدنيا كثير التجاريب

وانا الذي في حومه الحرب ماهاب
عيبً علي اهيب لو كنت باهيب

لا من سئلني واحدً قلت تجواب
إنا حفيد مكبرين المواجيب

قحطان فزاعه على كل الانشاب
قحطان تعرف في الليال الغياهيب

قحطان ما تخشى حريبً و حراّب
قحطان تعرف بالسيوف المخاضيب

عدوها خايف من الموت مرتاب
خايف وينفخ ما بقى من لغابيب

ناطى على الحيه وناطى على الداب
ونهذب اللي ماعرف ويش تهذيب

وخرجت برى البيت بشماغ وثياب
وارسلت مع طيري كلام ونواحيب

وهذا نهايه ما اقوله بلا اعراب
معاد ينفع في الشعر اي تعريب

الشاعر مسعود القحطاني