ذكرى جارحه - على مصطفى الديب

ذكرى جارحه
 
هايجى اليوم
ونتقابل
يكون شكل الحياه اجمل
واشوفك ذكرى من الماضي
واشوف شكلك من بعيد افضل
ولا ضحكه بتاسرنى
ولا دمعه بتكسرنى
ولا غنوه جوايا تهز الشوق
والاقى القلب متهنى
بيشكرنى
راجع سليم من الضربات
بدون ازمات
عايش رغم اللى راح منه
يضحك بس مع انه
ناقصه حاجات
تاهت منه فى الزحمة
خسرها فى معركه فاشله
كلام فاضى مالوش معنى
قصيدة شعر منسيه .
صوره قديمه تجمعنا
اشوفك عمر بيعدى ما احسش بيه
دمعه تسيل على خدى
ماتجرحنيش
شوارع كات بتكرهنى
و اهى رجعت بتحضنى
اروح القهوه لصحابى
واسهر سهره صباحى
نحكى عن كلام فاضي
اطوى الحلم فى جناحى
وانام مرتاح
لاول مره فى حياتى
اشوف الدنيا بعيونى
واعيش تفاصيل
غابت من سنين عنى
اخبى جراح
سرقت منى احلامى
براح ضيق بقا واسع
وبيساعنى
اشوفك من بعيد واسال
وايه يعنى تفارقينى
غشاوة عين
قساوة قلب نستنى الحياه ذاتها
اشوفك فيلم فى السيما بدون جمهور
بطل مقهور من الحسره
واقف وحده فى الصاله
بيتمنى
تخلف وعدها فى مره
تاجى فى لحظه وتحنى
و كان قلبى العبيط واقف على الكورنيش بيستنى
تطلى عليه
تشوفى عنيه وتحتيها هالات سودا ومرسومه بسهر الليل
وفى ضلوعى خيوط ذكرى وحزن طويل
راجع وشى متكرمش من التجاعيد
وانتى بعيد
بشوفك على الطرابيزه كوتشينه
ورق خسران
بيتوزع على الغايبين
ودلوقتى جه دورى
بسحب ورقة الكومى واشيل الكل
وانتى بتسحبى الشايب
زمن عايب
وهو العشق مال سايب بدون اصحاب ؟
لقا وفراق
بدون اسباب
اشوفك جوى عتبة باب
غياب قاتل
خنجر بين الضلوع ساكن
ومتوانس مع الاحزان
واشوف نفسى مريض نفسي بيتعالج بجلد الذات
اشوف سقراط
بيجرى ورايا
ماسكلى عصايه وبيقولى
خلاص اهدى
بلاد الله اهى واسعه
واتوب ازاى
وكيف اهرب من المكتوب
وانا المجذوب
بدخل جوى محرابك وبتوضى بلون الهم
واروح جنب الضريح اضحك وانام بكاي
واصحى هدومى ملطخه بالدم
قتلت الحلم والذكرى
هاياجى اليوم واشوفك ماضى ماهوش بكره
هاشوفك طاهره فى عيونى
وانا العاصى وكلى ذنوب
انا العاصى وكلى ذنوب
 
على مصطفى الديب
شاعر عاميه
جنوب الصعيد

تعليقات الزوار

  • كُل المحتوي و التعليقات المنشورة تعبر عن رأي كتّابها ولا تعبر بالضرورة عن رأي موقع الشعر.
  • التعليقات المنشورة غير متابعة من قبل الإدارة. للتواصل معنا اضغط هنا.
© 2022 - موقع الشعر