قطر الغياب - على مصطفى الديب

قطر الغياب
قلبى واقف ع الرصيف
و بينتظر
قطر الغياب
الوقت داب
على كل باب مكتوب
ممنوع دخول العاشقين
وانا وانتى ايه
انا وانتى مين
فدادين غنا
وغيطان حنين
يتسرسبو .. ..
زى السنين
 
قضبان حديد
واجراس بتعلن ع الملاء
وقت الرحيل
مناديل ورق
تمسح بقايا الحلم من فوق الجبين
وجرووح ... عرق
تنزف كلام
وايدين بترفع راية الحزن المباح
القطر ر ا ح
وانا حلمى دايما مستباح.
. تحت العجل
قلبى واقف ع الرصيف وبينتظر
مشهد الحزن المثير
وقلوووب.. وحيده فى الزحام
حكايات غرام
و بتنكسر
وبتنتهى بنفس المصير
وشوش يفارقها الوطن
ترسم حاجات على اليفط
برواز قديم جوى الشنط
وانا وحدى واقف برتجل
مشهد المووت المخيف
وانا وانتى ايه
حلم مفروش ع الرصيف
لعبه فى ادين العيال
حبة تراب متبعترين بين الشوارع
البوم صور
وحيطان بيوت متهردمه
انا وانتى ايه
عروسه بلاستيك
وحصان خشب
وشريط غناوى محزنه
يا قطر .. جاوب
قلنا ..
ايه اللى فاضل مننا
شباك تذاكر
عناوين محطات الوصول
وكرسى فاضى على الرصيف
 
على مصطفى الديب
شاعر عامية من صعيد مصر
© 2024 - موقع الشعر