نخيت انا الشعر وتعزوت حروفه
انا دخيلك يالشعر قال لا باس
قال اشتبي يا زابن بان خوفه
وش فيك يارجال تايه ومحتاس
قلت الحبيب اللي نبي ما نشوفه
ولا به شبيه له ولا مثله اجناس
(وقتي)( وحظي)( والسلوم) وظروفه
تحول دونه والمعاليق يباس
قال ابشر بعزك وعظم احلوفه
اني لاجيب اعلوم خلك بقرطاس
قلت البلا ما تقدر انك تحوفه
وصعب عليك اتجيه ياطيب الساس
ثم قال لي ما دام نفسك شغوفه
لاخبار خلك تظرب اخماس باسداس
دونك نسوق الحال ماهي حسوفه
ولزم(ن) علي اروح لرضاك عساس
وجاني وقلت اخبار راعي النكوفه
وجلس واشوفه فيه هم ووسواس
قلت العلوم وقال ما من مروفه
لقيت ناس دونهم عشر حراس
فيهم جمال مابه احد ينوفه
واحترت بازينهم وضيعت الاقياس
من بينهم غرو(ن) بحاله نحوفه
يفل شقر وسطها لمعة الماس
والناس في حفله وبيض كفوفه
وبان الحزن لي في حور ما ادري انعاس
دعج عيونه والمباسم عطوفه
وعليه خصر ناحل وقد مياس
ولاحضت به حاجه اكيد معروفه
الاخد الايسر فيه شامه ونبراس
ثم قلت وقف والله اني ذي اوصوفه
هذي اوصوف اللي عشقته من الناس
من قابله طول الدهر .. ما يعوفه
يبعد اهموم اللي طوى حاله الياس
احب انا طرياه واعشق اطيوفه
واحب كل ارض بها الزين قد داس
جعل المطر لاقام تنشي اقنوفه
يسقي اديار احبيبي عطر الانفاس
وشعر زهمته ثم تعزوت احروفه
انشهد انه عزوة ترفع الراس

تعليقات الزوار

  • كُل المحتوي و التعليقات المنشورة تعبر عن رأي كتّابها ولا تعبر بالضرورة عن رأي موقع الشعر.
  • بعض صور الشعراء و الشاعرات غير صحيحة، نرجو تبليغنا إن واجهت هذى المشكلة
  • إدارة موقع الشعر لا تتابع التعليقات المنشورة او تقوم بالرد عليها إلى نادراً.
  • لتواصل مع ادارة موقع الشعر إضغط هنا.
© 2019 - موقع الشعر - بواسطة شركة المبرمجين