لا تخاوي رفيقٍ له مزاج متغيّر

لا تخاوي رفيقن له مزاج متغيّر
ان لقا منْك زله زم خشمه عليها

ايتقلب تقلاب الخفيف المطيّر
كل ماجا يكحلها لزوم ايعْميها

مايهمه لو انك رجل طيّب وخيّر
المهم ردته للفعل فيها وفيها

والله انّه من علوم المكارم فقيّر
ناس باخلاقها تغنى وكلن يبيها

الغنى ماهو من مالٍ وشيكٍ مجيّر
كلن نفسن غناها ماتقدّم يديها

هذي الناس فيها الناس طب وتخيّر
الحظيظ ان لقى ناسن تجيه ويجيها

كم رفيقٍ على الهقوات طاح متحيّر
يوم لالرجل شرهاتن ماهي تحتويها

خامل الذكر ما والله يروح ويسيّر
الكدايش يسرّجها قدم يمتطيها

يقصر اللاش يوم انه بشبره قصيّر
والكفو طايلن شبره ونفسه نزيها